Yo no konosi Hasköy...

Coya DELEVİ

Par konsekuensa, no esto en pozisyon de relatar rekuerdos. El uniko lugar, ke vijito, es el I.Y.D.(el Azilo de los Aedados) Aki, kero tresladar un relato del Prof. Avram Galante, del livro-Histoire des Juifs de Turquie-:"En 1905, un grande fuego en el distrikto de Maalem, desho 1500 Djudios sin techo. 126 kazas, 5 botikas i la eskola "Alliance" de las ijas kedaron entre las flamas. La Sinagoga, syendo konstruksyon de pyedra, salvo del fuego…"
Despues del fuego, las elevas  kontinuaron a estudyar en la de los ijos. Resivyeron una edukasyon miksta. Djustamente, esta "Alliance" de los ijos, es la fragua, ke oy, abriga el I.Y.D. La fragua fue restorada en 1963, los aedados fueron transferados ayi. Kero tresladar sus eslogano: "El dezeo de ser feliche esta en muestro korason, darmos felisidad, esta en vuestra mano." Bastante sinyifikante, no?!…
Aki, un relato sovre los fuegos de Hasköy, del livro "Relatos i Refleksyones" del Sr. Salamon Bicerano: "Los fuegos de Hasköy eran famozos, i kuando ampesava un fuego, el morador de la fin de la kaleja ampesava a vazyar la kaza. Los bomberos no teniyan las posibilitas de alkansar a todos, por mankura de kaminos…las moradas eran alumbradas kon lampas de petrol i, los aksidentes no faltavan."
Hasköy, era el foburgo de Estambol, tenyendo la mas grande populasyon de Djudios. Oy, pratikamente, no egziste munchos. Kuando se nombrava Hasköy, se deviya nombrar i Balat, komo si fueran buchukes!…Portanto, syempre uvo una "dulse" rivalita entre los doz foburgos. Mi esfuegra, engrandesida en Hasköy, me kontava, ke ser de este distrikto, era para eyos, un motivo de orgolyo! Dizyendo, ke los "Hasköylüs" eran mansevos, i, los "Balatlıs" eyos, "pasikas!" Naturalmente, i los de Balat, afirmavan el kontraryo. Eya estudyo en la Alliance de Hasköy, ande veniyan nombrozoz ijikos i ijikas de Balat, de Fener ets…I, es ansi ke konosyo i se izo munchas amigas de Balat.
Me kontava insidentes de antes 60ᇚ anyos. Malorozamente, kon la neglijensa de la mansevez, no di muncha importansa akel tyempo, komo esto dando oy, a los rekuerdos. Aktualmente estamos azyendo esforsos para arrekojer, arrebivir estos rekuerdos vyejos. Esto pensando ke pyedrimos trezoros de la Kultura Sefaradi, kon la pyedrita de muestros avuelos.
En una okazyon, kaji antes doz anyos, pasi en oto, por la oriya del Haliç (Corne d’Or). Serka del vyejo ponte de Galata dezmontado (ke lo transferaron a Hasköy), remarki un edifisyo chiko, simpatiko. Malgrado su aparensya istorika, ya estava evidente, ke fue, en serka tyempo restorado. Solo lo ke pude azer, fue tomar su nombre:-Kafe Safiye Sultan-, i ambezar ke, a su orijin, era una vyeja Sinagoga.
Me aprometi de ir un diya, espesyalmente, para konoser este lugar, i embezarme mas…i, lo ize, la primera semana de Enero 2006. Yo preferariya irme kon vaporiko, ma no ay en este momento, eskala en Hasköy. Por siguro iva ser mas nostaljiko. Me fui direktamente al Kafe, ande me embezi una partida de su pasado.
"Un grupo de los Djudios ekspulsados de la Espanya, instalados en Hasköy, fraguaron en medyo del 16. Siglo, la Sinagoga Ezger, ke kontinuo a ofisyar asta los anyos 1910. (ofisyante=hazan). Su nombre esta sitado entre las Sinagogas de Hasköy, en el "Anuaryo Oriental" de 1912. Ay indisyos, ke akeyos anyos, el Hazan era Rav Nisim Eskenazi. Despues de 1912, no esta muy klaro. El lugar fue empleado komo depo de kombustivle, de fyerreriya ets…"
Entremyentes, la Sinagoga Ezger, o, mas egzaktamente, sus restos, kayeron en ruvinas. En el kuadro del amijoreamyento del Haliç, i de sus oriyas, EZGER se tomo debasho proteksyon, en tal ke ovra istorika. En la restorasyon de la ansyana Sinagoga, se empleo pyedras i tejas espesyal, kaji otantikas. Finalmente, se transformo en "Kafe-Restoran-Safiye Sultan," todo en konservando su kompozizyon istorika.
Mos asentimos en el Kafe, ke me aviya imajinado "ekskluzivo"! para ombres. Porke, se yama tambyen, "Café-Nargile." Me enkanti de ver kuples mansevos, djugando a tavli!…Le demandi al patron, komo fue la reaksyon de la komunita Djudia, verso la transformasyon de Ezger, en un kafe. Las repuestas ke tomi no me dyeron una satisfaksyon kompleta. Sinti komentos kontradiktoryos, ke deven ser konfirmados, por no azer yerros sovre EZGER.
 En el kafe, no se esta servyendo alkol, en sinyo de respekto a su antepasado relijyozo. En un lugar de esta entrevista, mi marido se akodro, ke en los anyos 1945, el teniya una amigita de Hasköy, Roza Eskenazi. Eya deziya ke su avuelo Rav Nisim Eskenazi, era el Hazan del Kal de Hasköy. Seriya el mezmo ke nombrimos mas arriva? Tengo syertos dubyos, achakes del intervalo de anyos.
Penso, ke oy en diya, avra en Hasköy, algunos ke pueden kontar rekuerdos i anekdotas vyejos. Al pareser, ke en una okazyon, va ir dar un torno a Hasköy, para konoserlo mijor i kompensar los anyos de neglijensa.