AKODRARMOS...

Coya DELEVİ

Keridos lektores, este teksto es kompuesto (oluşmuş) en grande partida, de los relatos ke tresladi del artikolo aparesido en el JERUSALEM POST del 10 Marso 2006. Pensi de publikarlo en akeyos diyas. Ma, aviya un trafik imenso de tekstos sovre Ester, Purim, ets…Konsiderando la importansa del sujeto, dechidi de atrazar la publikasyon asta oy.
No esto transferando el teksto integral, (tamamı) aun ke ya lo tresladi kompletamente. Renkontri syertos propozitos ke puedo un poko kalifikar de "ozados". Yo, no esto podyendo permeterme esta ozadiya. En jeneral, munchos komentos syendo en el paralel de mis ideas, pensi ke deviya transferarlos. Efektivamente, en mis artikolos, de vez en kuando, eskrivo sovre el menester de inkulkar nosyones, preseptos de Djudaismo a las kriaturas. I, djustamente, es de estas garansiyas para muestro futuro ke se trata aki, kon un lenguaje enerjiko, ke yo, no podriya ekspozar. Veremos:
"El prinsipal,(o uno de los prinsipales) dono del Djudaismo es el akodrar, la memorya. El byervo ZAHOR es la yave de munchas "mitzvot" i valores del Djudaismo. Es tambyen la baza de muestro diya santo de Shabbat, ke, en los 10 KOMENDAMYENTOS, empesa kon el byervo ZAHOR:"Akodrate de sanktifikar (kutsamak) el diya de Shabbat".
Yamim Noraim son los diyas de djuzgamyento i perdonansa del muevo anyo Djudio. En las orasyones, son nombrados komo YOM HAZIKARON, diyas de akodrarmos. La "mitzva" del TZITZIT, es dedikada al akodrar de todos los Komendamyentos de la TORA.
"Vemos munchos egzempyos, seya en la TORA, seya en la vida i Histora Djudia, mostrando ke esta memorya es la baza esensyal para la kontinuasyon i reushita. Un puevlo ke no se akodra de su pasado, tyene un futuro indeterminado (belirsiz). Esto es valivle para las personas i para las nasyones tambyen. No kale olvidar ke kada uno puede ser un AMALEK (*) PARA MOZOTROS. I, es muy difisil de gerrear kontra las amenazas, (tehdit) si un puevlo, una nasyon, no se akodra su pasado."
Ay de pensar ke una grande partida del puevlo Djudio, esta sufriyendo de "amneziya", de una mankansa de memorya. I, munchas vezes, es un olvido VELUNTARYO. Se olvidaron de la edukasyon Djudia, o, la estan inyorando kompletamente
" Asimilandosen kon la kultura estranyera, una grande majorita de los Djudios de la Diaspora, pyedreron o estan pyedrendo todo modo de atamyento kon sus pasados. Estan komo desparesidos del mundo JUDAIKO. Ansi, estan destruyendo (yok etmek) toda esperansa de una memorya Djudia, para sus ijos i futuras jenerasyones. Munchos dezeozos de tornar a sus orijen, sin una trasa de memorya, tyenen difikultad de topar sus kaminos."
"En un senso jeneral, todas las Mitzvot de la TORA, se ven kon el ayudo de la memorya, ke repoza sovre eksperyensas, evenimyentos de la Historya i de la vida. Las golores de un mupak (kozina) Djudio, un diya de vyernez, mos azen akodrar ke Shabbat es reel, inolvidavle.Asentados debasho de la Suka, sintyendo el Shofar, o, komyendo Matsa en el SEDER de Pesah… Estos son los elementos ke forman muestra memorya".
Son estas eksperyensas, estos rekuerdos memoravles, ke fueron kapavles de transmetersen de jenerasyon en jenerasyon, i konservados komo trezoros. Solamente esto, puede darmos una fuersa pozitiva. Es, la MEMORYA DJUDİA, ke mos va garantizar muestro prezente produktivo i muestro avenir tambyen.
"Kada anyo, las Perashot ZAHOR, kon su espesyal lektura de la TORA, mos rekomendan de no olvidar AMALEK. Puede ser sin esta rekomandasyon, (emir) mos podriyamos olvidarlo, o, efasariyamos el OLOKOSTO de muestras memoryas i korasones. Ma, no es solo Amalek, es toda muestra Historya, el pasado, muestros ansestros, el mesaje de SINAY, ke no devemos tambyen olvidar".
Keridos lektores, aktualmente, ay un punyadiko (bir avuç) de djente ke estamos luchando para ke no kaygamos en este olvido, para ke syempre mos AKODREMOS. Mi sola arma es la pendola. Estamos suetando mas demaziya entereso de la jenerasyon ke vino despues de mozotros. Esto kreendo ke munchos tyenen el potansiel. En metyendo el punto final, kero embiyar mis sinseros suetos de repoza i sanedad, a la okazyon de PESAH-HAG SAMEAH.
                                                                                           
(*)-Amalek, Amalakim: Puevlo aparyentado (akrabalık) kon el Tributo de Efraim. Portanto, fueron enemigos sin piadad de los ijos de Israel. Muy frekuente, estuvyeron en gerra kon los Djudios del tyempo de los Reyes Shaul i David. Atakaron en Refidim, a los Djudios salyendo de Misraim. Se dize de una persona kruela, sin piadad. C.D.