AMIGOS!!…Devo admeter ke dekoramos del nombre de amigo, una simple relasyon, un konosimyento o un vezindado. Aki, vos kero sitar la remarkavle definisyon del famozo fabulisto, LA FONTAINE: "Kada uno se dize muestro amigo,"
"Loko es el ke se kree a esto."
"Nada es mas komun ke el nombre,"
"Nada es mas ralo ke la koza…"
Espero ke lo pude tresladar komo se deve. Alora, vos puedo konsejar de kontar los amigos sinseros ke tenesh, o ke vos kedaron. Porke de vez en kuando, tyenen la manya de alesharsen!…Seguro no esto avlando de los ke son reelmente sinseros. Orozamente, ke yo, tuve i tengo la shans de posedar este modo de amigas. Puede ser ke son en un shifro chiko,vuestros amigos sinseros, ma, sufizyente. La fuersa moral de sus amistad, es muncho mas grande i seryoza ke la del muchidumbre de konosimyentos superfisyales.
Entre estos buenos amigos, avra siguramente, unos ke okupan un lugar eskojido en vuestro korason, porke son de una influensa pozitiva para vozotros. Esta manera, no vaj a ser akaparados kon relasyones ke no vos dan moralmente, nada. Ma, syempre vaj a saver ke tenesh amigos verdaderos, sovre kualos puedesh kontar, i al menester, arrimarvos.
Mis propozitos ke no vos enkanten. No son del todo la ekspresyon de un pesimismo, solo frutos de observasyones i eksperyensas de una vida.Yo konosi antes munchos anyos, una dama muy sezuda, asegun mi.Le uzava a demandar konsejos de vez en kuando. Ma, koza kuryoza, no teniya munchas amigas. Kuando le demandi la razon, me respondyo: "Las amigas, en jeneral, tyenen el natural del melon! Kale aprovar sinkuenta, para topar una buena." Estas palavras, akel tyempo me paresyeron indjustas i pesimistas. Ma, agora, a la luz de mis eksperyensas, la esto entendyendo mijor, i dando razon a mi vyeja i kerida amiga.
"Es la insufizensya de muestra persona ke aze naser la amistad, i es la insufizensya de la amistad, eya mezma, ke la aze despareser." Adjustando a esta sinyifikante dicha, vos kero prezentar doz otras de mezma sinyifikasyon: "Los amigos verdaderos, son paryentes eskojidos." Ernest Legouve. "Los paryentes los somportamos, ma, los amigos, los eskojemos." Emile Augier.
Todos tenemos menester de una manera o otra, apoyo i fuersa moral, i en vezes, puede ser materyal. Montesqieu disho: "Kuando me fio a alguno, lo ago sin rezerva. Ma, me fio a muy pokas personas." No es en vano ke se dize: "Dime ken frekuentas, te dire ken sos." Los amigos muestros son mas o menos una indikasyon presyoza para los ke mos keren djuzgar. Pueden dar una idea de muestras preferensyas. Vos desho kon uno de mis poemas, ke eskrivi antes unos, doz anyos, i, ke eksprima mi konsepsyon de la amistad.
