Esta refleksyon se topa en el ultimo livro de Matilda Koen Sarano intitulado"Por el Plazer de Kontar". El no es espesifikamente un livro de kuentos o de narasyones ...ni un livro didaktiko ni tambyen solo de reminisensyas. El livro de Matilda es esto todo.
A la vez, nostaljiko i aktual , sentimental i realisto, multiforme en su prezentasyon, riko en nuansas i refleksyones komo tambyen en faktos otentikos kontados en un estil syempre fasil a entender, direkto i klaro, este livro es la saga de una famiya judia en sus perigrinasyones kontinuales, el amor del avuel Moshe por la nona Alegre, eya mizma mujer de alta kultura, estudyada en las eskolas de la Aliansa, mujer kerensyoza, refujyo sentimental para sus inyetos ... los paryentes de la eskritora, seheludos i tradisyonalistos... Su propyo marido "Aharon" ombre sezudo i de una buendad por la kuala kada uno de entre mozotros ke lo konosemos de serka puede testiguar los ojos serrados... este livro es la suma de una vida en sus grandes linyas komo en sus chikos detalyos, los kualos debasho una futilidad aparente son yenos de senso.
Matilda mos transmete su mirada sovre el mundo ajeno komo serkano, refleksyones de una mujer amada por todos i ke eya tyene el dono de amar..... Este punto es muy importante: "Matilda ama la vida", "ama la djente en su multiplisidad" ... "ama el payis del kual sus paryentes eran orijinaryos, "la Turkia" ...."ama su propyo payis de nasimyento, "la Italya" , ama sovre todo "su payis de egzistensya, eternal avrigo para un puevlo kanso de la prekaridad de su destino, asedado de paz, de estabilidad i de dinyita".
Este livro en su semplisidad es el reflekto de una filozofia echa de las eksperyensas personales de una mujer i madre, una filozofia transmetida de jenerasyon a jenerasyon, a kada vez renforsada i enrikesida.
Ay en eya una verasidad fundamental porke es echa no solo de konseptos abstraktos o de espekulasyones intelektuıales, ma de refleksyones personales provokadas por akontesimyentos reeles.
No mos olvidaremos ke en desparte del pensamyento konseptual, ay tambyen el pensamyento empiriko, kaji igualmente profundo, inspirado por la vida de kada dia en la multiplisidad de sus variyantes.
İ es djustamente esto ke aze de este livro una ovra otentikamente umana kon sus momentos de alegria i de tristeza, sus iluzyones i sus deziluzyones, su konfiensa indefektivle en la vida, su entuzyazmo i su perpetual esforso de entender i de mantener el kontakto kon los otros..
Los rekordos de su chikez , Matilda los valoriza kon su manera de kontar tan savroza: "su primer amor por un amigo de klasa", "su primera desepsyon"..."la tavla de dulse ke eya (en la kaza de su padre) devia prezentar a los kombidados, testimonyo de buena edukasyon", "el uzo, de la parte de los invitados, de refuzar al empesijo i de no achetar de servirse ke despues una larga insistensta de la parte de la balabaya", ets.. ets...
Uzos i kostumbres ke aktualmente desparesyeron enteramente de la egzistensya kotidyana, futiles en aparensya ma ke testigavan de una syerta manera de pensar i mizmo de una syerta manera de ser.
Kada lektor puedra topar un poko de si mizmo, de su chikez, de sus rekuerdos en este livro dedikado en mizmo tyempo al plazer i tambyen a la refleksyon.
