K. P.Martes el 25 del mes de Abril 2006Amanyana la noche, 26 Abril 2006, tendra lugar en el Sentro Cemal Reşit Rey, un konserto muy interesante .No se si personalmente vo pueder asistir, depende de las kondisyones atmosferikas i del estado de salud de mi marido ... ma vos kero avlar del evenemento en si mizmo.
Coya DELEVİ
Antes de pasar al sujeto esensyal, pensi de eskrivir unos, doz byervos sovre esta laja del MEMORIAL d’AUSCHWITZ-BIRKENAU, solamente por rememorar su empesijo. En Marso 2000, el Prof. Sephiha, izo una konstatasyon ke le dyo una pena i indinyasyon imensas. En el Memorial, entre las 20 lajas de linguas diferentes, no aviya la de J-Espanyol. Esta lingua ke fue (aproksimativamente), la de los 160.000 Djudios deportados del Balkan i otros paises.
Haim-Vidal Sephiha, djuntos kon el Dr. Michel Azaria, fondaron la asosyasyon J.E.A.A (Judeo-Espanyol A Auschwitz), i empesaron una kampanya de petisyon. Despues de aver arrekojido bastante de sinyaturas, en la reunyon del Konsilyo Internasyonal d’Auschwitz, en el 10 Septembre 2001, se dechido de pozar la 21. laja. La inogurasyon se fikso para el 24 Marso 2003. Antes de esto, el Prof. Sephiha fue envitado de la parte de los ambasadores d’Israel i d’Espanya, a una reunyon organizada por el UNESCO, en el 17 Junio 2002.
En estas reunyones, el Prof. Sephiha disho sus alokusyones, en Fransez. Mi ijo Metin, le eskrivyo una letra en la mizma lingua, empesando kon: "Cher Mr. Sephiha…, " demandandole, si posivle, los tekstos en J-Espanyol. I, eskapo la letra kon:"…Je vous remercie d’avance, .Metin Delevi.
El Prof. Sephiha no manko, i muy amavle, embiyo esta letra:
"Je vous l’envoie a l’instant. (de vista vo la esto mandando). Aki la tyene.
Keridos ermanas i ermanos, si dishe mi alokusyon en franses en Auschwitz-Birkenau, es ke teniya ke respektar muestra Prezidenta Simone Veil i los diplomatas ke no entendyen muestra lingua i ke jeneralmente todos los muestros son ijos de las eskolas de la Aliansa. Agora, ansina komo lo prometi, vos mando mi trezlado en djudeo-espanyol."
Alokusyon de Haim-Vidal SEPHIHA 24 Marso2003—Memorial de Auschwitz-Birkenau, estreno de la laja en JUDEO-ESPANYOL.
"Ermanas, ermanos, ijos de ombres!
Na, trajika ironiya, la Tierra Prometida ke mos aparejavan los Nazis! Tierra, ande pretendiyan adjuntar las famiyas djudiyas. En realidad, ande brutalmente fuimos guerfanos de padre, de madre i de todos los muestros. Nueva Babel, ande los ladridos nazis dominavan. Tierra, ande "muestras karas-komo diziya Benjamin Fondan? Servieron de eskupidero a los S.S." Tierra de servidumbre sin esperansa de un MOSHE salvador.
Yegado aki el 22 Septembre de 1943, a los tres diyas, sinti en supito "mi dulse lingua natal," kuando, yevando tuvlas en una anda, mi kompanyero de afriisyon me grito: "AYDE"! Era un Selanekli. Nunka mas iva a verlo. Me afito daynda de avlar muestra lingua, i sovre todo, para ganarme media supa, de kantarla kon la romansa de mi madre: "arvoles yoran por luvias".
57 anyos despues de mi deportasyon, en Marso 2000,aboltava kon espanto en esta tierra de afriisyon. 57 anyos despues, me aferrava el silensio estruidor de esta fabrika de muerte. 57 anyos despues, me egzijiyan las bozes de los miyos. Aki, en este Memorial, faltava la laja en djudeo-espanyol. Chapteado, indinyado, no puediya akseptar tal absensya!
Kon Michel Azaria i unos kuantos amigos, fondimos la asosiasyon J.E.A.A, ke yevo kon tenasidad, la aksion en favor de esta laja. Oy estamos arrekojidos delantre deya. Oy estan gravadas aki, para siempre, las dulses sonoridades de muestra lingua ke, al zeman, ansina kantava el Haham Bashi deTurkiya, Haim Bejerano" :
--A ti lingua santa / a ti te adoro,/ mas ke toda la plata,/ mas ke todo el oro.
--Tu sos la mas linda / de todo lenguaje./ A ti dan las siensas / todo el ventaje.
--Kon ti rogamos / al DIO de la altura,/ Patron del universo / i de la natura.
-Si mi puevlo santo / el fue kativado,/ kon ti mi kerida / el fue konsolado.
Munchas grasias kerido amigo. Karinyozamente."
Haim-Vidal Sephiha..
No esto sigura, keridos lektores, si esta alokusyon del Prof. Sephiha se tyene publikada en el "Şalom." Ma, Auschwitz, es el simbolo de la mas grande trajediya de la historia de los djudios. No devemos olvidarlo. Se va eskrivir, se va mensyonar, se va repetar asta la fin de los tyempos, komo lo disho muestra kerida Klara Perahya. Es un dover sakro de transmeter este rekuerdo, de jenerasyon, en jenerasyon, por nunka olvidarlo, syempre akodrarlo.
Coya Delevi- 25- Avril- 2006.
