Ken puede saver lo ke es reelmente la vida? ...kada uno topa una repuesta diferente ke kaji nunka es la verdadera... puedeser la suma de todas muestras echas?... o byen la posivilidad de azer una koza valivle ke puedra justifikar muestro pasaje en este mundo?
Jaques Afnaim fue una de estas personas ke supyeron asumir kon dinyidad i merito sus responsavilidades de "ser umano" byen pensante, konsyente i aktivo. El fue buen marido, buen padre i ermano, buen amigo,buen sitizano, buen myembro de su komunidad , ombre djusto i derecho komo me disho uno de sus kolavoradores, ombre de prinsipyo sin ser absolutamente dogmatiko, muy metikulozo, estrikto a syertos momentos ma no intransijente, al kontraryo muy komprensivo, avyerto al kontakto umano.
Tuve personalmente kon el una chika eksperyensa, ke vos kero kontar i ke sera un omenaje muy sinsero de mi parte a su eguardo. Ay muncho mas de kinze anyos, el "Barin Yurt" no egzistia ainda i la Matan Baseter, la Ovra Madre, tenia de distribuir kada mez, komo lo aze ainda oy, mas de 300 paketos de komanya... ma ande apozar? Esta ovra asta la kreasyon del B:Y: no tenia ningun lugar estavle i "el sistema de distribusyon de paketos" estava reelmente en perikolo. En el mizmo tyempo avia detras del Kal de los italyanos un espasyo vaziyo, i mozotros demandimos al komite dirijente la permisyon de aprovecharmos de el; Jak Afnaim myembro eminente de la komunidad ıtalyana fue muestro interlokutor en este kavzo. El tuvo un momento de ezitasyon i mos disho... "Por seguro vos keremos ayudar, ma tenemos el uzo de resivir envezes personalidades del Konsolato Italyano ansi ke nombrozos vijitadores estranjeros, todo deve ser perfektamente limpyo i en orden ... Me prometesh ke va ser ansi? sin konviksyo de pueder kompletamente ser fidel a muestra palavra, izimos un djesto afirmativo... No se asta ke grado el mizmo estava konvensido de la koza.
El dia de la distribusyon, el rezultado fue leshos de ser satisfazyente, kashas vazias ke devian ser retornadas al vendedor, fueron metidas ahuera la puerta... en un kanton un monton de papeles de ambalaj byen dublados mas por seguro no impekavles ets... ets... unos kuantos dias mas tadre, lo enkontri en la kaye, kuando me vido el enfruzyo las sejas... "Klara te olvidates tu promesa?"- "Tyenes razon, ma fue ahuera de muestra voluntad"...-"al mez ke vyene vos vere, espero ke ...." .
Esto turo nombrozos anyos... Malgrado su grande metikulozidad i su propya responsavilidad de dirijente komunitaryo el supo ir mas leshos ke sus prinsipyos de orden afin de no sakrifikar un sistema de ayudo a personas menesterozas.
Bendicha sea su memorya i ke su Alma repoze en paz.
