El 26 Avril, asistimos a un konser en el salon Cemal Reşit Rey. Otras amigas van eskrivir a este sujeto. En desparte, en estas datas, se projetaron filmos, ke dyeron luz a la eskuridad, kon el eslogano "Kare Preto Diyas De Filmos." Sin dubyo, la mas emosyonante nochada fue, la del 27 Avril djugevez, organizada por el Gran Rabinato, en U.Ö.M.L, en komemorasyon del Holokosto. En primero vijitimos la ekspozisyon "Testigo a La Vida," ande se utilizo vizyones tomadas del Muzeo Yad Vashem, i Lohamel Ha’Getaot.Es difisil de pueder eksprimir aki, en unos kuantos byervos, los sentimyentos diversos de kada uno: apretamyento de korason, amistad, revolta, indinyasyon?…No se egzaktamente…
En supeto me topi delantre de una vitrina. Me travo un par de sapatikos, i, otomatikamente, empesi a resitar de mi para mi, kon dos lagrimas en los ojos, los versos de muestro amigo Eli Perahya.
Enserrados en una vitrina,
Dos sapatikos
En el friyo i la soledad
Komo dos guerfanikos,
Me kontan sus estorya.
En el korso de los diyas, en supito,
Nuves pretas taparon el sol,
I en tinyevlas se troko
La luz del diya.
Agora, ke bushkamos aki?
Entezados debasho estos.vidros….
Keridos lektores, espero ke Eli Perahya, mos va embiyar, otruna vez, en kompleta, esta ermoza poezia para los ke no la konosen. En el final, de la ekspozisyon, me kedi para konoser los nombres de akeyas personas, "Rightous among The Nations," personas djustas, manyanimas. Entre eyas, konosi el difunto Sr. Selahattin Ülkümen, paryentes de una amiga miya.
Despues del kokteyl, pasimos al Amram Auditorium, sintir la Sra. Ruth Fayon. En el "Şalom," se publiko su biografia, en Turko. Eya es una de los ralos reskapados del ginnam de Auschwitz. Nasida en la Chekoslovakia, estuvo en el kampo Theresienstadt (Terezina) asta el Desembre 1943, despues en Auschwitz, asta el enverano del 44. Las embiyaron komo lavorantes, a eya, su madre i ermana (ke syempre estuvyeron endjuntos) a Hamburg, de ande fueron salvadas por los Inglezes, en 1945. Bivyo un syerto tyempo en Israel, i, entre 1953ᇌ, en Estambol, ande kazo. Aktualmente, bive en Geneve, kon su famiya.
Yo konosi Ruth Fayon, antes 30 anyos, en sirkunstansyas trajikas. Me disho akodrarse de esto, myentres ke tuve la oportunidad de avlar kon eya, en el fuaye de U.Ö.M.L. Le tomi la permisyon de mensyonar su nombre, en el dosye ke esto preparando sovre el evenemento terrivle del Agosto 1976, i ke penso publikar en "El Amaneser."
La noche del 27 Avril, por primera vez, entendi el senso profundo del byervo "Empati". En sintyendo Ruth Fayon, la desgrasya ke bivyeron, me olvidi del derredor, de la djente i me konsentri a oyirla, unikamente. Esto regretando, (por mankura de lugar) de no pueder relatar todo lo ke mos konto. Otruna koza ke remarki, es el "sensyo d’humour" de la Sra. Fayon. Afilu en medyo de una narrasyon trajika, o, en respondyendo una pregunta, fue kapavle de meter una nota umoristika, i, azermos sonreir.
La nochada se termino kon el konser esmovyente del Koro Ankor, ke es una partida de la Orkestra Filarmonika de Israel. Partisipa tambyen, a las aktividades organizadas por Yad Vashem.
Lo ke puedo yo, solo dezir es: nunka pensaremos kon un sentimyento de egoismo "Bueno ke no bivi yo este ginnam!…"Nunka pensaremos ansi, ma syempre mos Akodraremos.
