Klara PERAHYA
En el espasyo de 10 dias, en kaji kada payis del mundo oksidental, tres komemorasyones reflektaron por un chiko espasyo de tyempo el destino djudyo i en mizmo tyempo la istorya del ombre en las limitas de su “Ser”:
"Yom ha Shoa": Epizodyo no solo dolorozo ma absurdo del ombre, en tanto ke kriansa pensante... mancha indelebile... testigo de un terrivle "facha kon facha" kon el konsepto del mal... prova de la amenaza ke syempre se topa sovre una Umanidad ke manka de umanizmo... i en mizmo tyempo, responsabilidad de una libertad ke kontyene en eya el ovligo de dever syempre eskojer entrela luz i la oskuridad.
"Yom ha Zikkaron": Syempre reminisensya de la dolor, ma mesklada a la glorya ... famiyas en dolyo, mansevos por syempre mankos ma ke muryeron en tanto ke ombres forros en sus lucha por la independensya .
"La muerte es syempre la muerte" dizeran munchas personas. Si, es la mizma sufriensa, la mizma absensya por syempre, ma no el mizmo "Non Ser"... Es otra koza de murir komo un kodrero ke se yeva para abatir , i absolutamente una otra, de murir por un eskopo las armas en la mano.
"Yom Atsmaut": Rekordo de una alegria syempre amargada, reflekto no solo de una viktorya, ma de una mueva responsabilidad: tyerras asekadas a sembrar, espasyos kuvridos de arena sovre los kualos fraguar, nesesidad de krear, dia despues de dia, un espasyo ande pueder bivir i sovre todo: ovligo de guadrar su fidelidad a los preseptos del dekalogo todo en kaminando kon su tyempo.
Ainda, oy en dia, una situasyon problematika , ainda la insertitud, ainda i puedeser por syempre el dever de kontinuar la lucha no solo kontra la inimistad de los otros ma tambyen kontra muestra propya kanserya, i muestra propya tentasyon de inimistad.
"Yom ha Shoa", "Yom ha Zikkaron", "Yom Atsmaut", tres datas ke abutisyeron a un payis ke (malgrado las kondisyones atmosferikas desfavoravles, malgrado el aborresimyento ke lo entorna, malgrado los prejuisyos del mundo ajeno) supo en kurto tyempo krear: uno de los mas grandes sentros de bushkidas syentifikas, unas de las mas grandes universidades, uno de los mas famozos orkestros filarmonikos ets... i tambyen, el mas fuerte esprito demokratiko del mundo.
