En las kayes, karas sonrientes de mujeres kualas vestidas de vedre, kualas de blue o de roz-pembe, kaveyos despenyados por el ayre envezes loko ma syempre klemente... En el aver primeros proyektos de viaje o de paseos... I tambyen primeras bodas de despues de Pessah , syempre Berith-Milot i Vijolas ansi ke konsertos, ekspozisyones i muevas revistas echas por jovenes, sin olvidarmos las buenas novelas ke resivimos de la parte de los amigos ke se topan por ahuera i ke vos transmetemos si no en totalidad por mankura de lugar ma a lo manko parsyalmente.
La semana pasada endjuntos kon la distribusyon del ŞALOM, muestros lektores resivyeron el primer numero de la mueva revista SALOMİST yena de artikolos sovre multiples sujetos i aparejada prioritaryamente por mansevos intelektuales de grande valor de muestra komunidad. Reushita buena .
***
Vyernes 19/20/2006 vijola de una linda donzela ke fue nombrada Natali Valansi
Mazaloza i venturoza ke sea i el Dyo ke la bendiga i la guadre de todo modo de mal.
Felisitamos la madre i el padre Irem i David Valansi ansi ke los avuelos: Meral i Av. Nedim Karako, de mezmo Franka i Mordehay Valansi
***
Shabat el 20/5/2006 Barmitzva de Mert Özsarfati ijo de Belkis i Dr.Jak Özsarfati.
Ke el sea syempre bendicho i amado del Dyo i de la djente , ansi ke ombre de buena ventura, mazalozo i provechozo para todos sus serkanos, su Payis i su Komunidad.
Muestras sinseras felisitasyones a Belkis i al Dr.Jak Özsarfati a los kualos auguramos alegria i kontentes.
***
Alhad 21 /5/2006 Primeras bodas de la sezon en el kuadro somptuozo del Kal NEVE ŞALOM
Perin ija de Esther Özhazday i Henri ijo de Sara - Eliya Zarkon
Dalya ija de Yıldız - Rafael Barzel i Şay ijo de Sara - Sabetay Ervaron
Rina ija de Rebeka Salti i Yosef ijo de Süzan Alçe
Soli ija de Esther - Marko Yakışır i Rober ijo de Rahel Gatenyo
Sara-Lora ija de Süzan - Selim Cemal i Daniel ijo de Rozana - Dr. Moşe Kazado
adjuntaron sus vidas en los kantes, la alegria i el amor.
Los Syelos ke los bendigan i ke syempre sean unidos en la kerensya resiproka, la prosperidad i la muchiguansa.
Todas muestras felisitasyones a las famiyas Özhazday i Zarkon, Barzel i Ervaron, Alçe i Salti, Yakişir i Gatenyo
Ansi ke Cemal i Kazado a las kualas auguramos de syempre ver bueno en sus ijos.
***
En los proksimos dias:
Martes la tadre el 23 del mez de Mayo, en el espasyozo oditorium del "Instituto Italiano de Cultura": Konserto del duo "Dr. Musa Albukrek (violin) i Leyla Yenisey Artoy (piano)" ke van a interpretar ovras de Haendel, Beethoven, Mozart, Tor Aulin i Johannes Brahms.
El Dr. Albukrek es un espesyalisto de muzika baroka i klasika ke el syempre egzekute kon grande sensibilidad i profondura. Ansi, sus nombrozos konsertos i resitales devinyeron uno de los simbolos artistikos de muestra komunidad.
***
Myerkoles el 24 Mayo a las oras 20.--: Kokteil de avyertura de la ekspozisyon de timbros Sefardies de Mordehai Arbell, en el İnstituto Cervantes de Estambol, Tarlabasi Bulvari, Zambak sok. No:33 TAKSIM
Personalmente vos konsejo de no mankar de vijitar esta egzibisyon tan intersante i de azer la konosensya del koleksyonor, ombre de grande kultura ,polivalente en sus aktividades intelektuales i ke tyene un pasado diplomatiko muy riko.
***
El 6 del mez de Junyo: en el Oditoryum de la Bilgi University- Dolapdere: "Selebrasyon del venten Aniversaryo del Establisimyento de las Relasyones Diplomatikas entre la Espanya i Israel", organizada por el Konsolo Jeneral de Espanya Sinyor. Raimudo Ezquerra i el Konsolo Jeneral de Israel Sinyor Mordehai Amihai, ansi ke por el Direktor del Instituto Cervantes Dr. Pablo Martin Asuero i la sinyora Batia Keinan Atashe kultural de Israel.
La seremonia sera sigida por un konserto durante el kual Karen Gerson Şarhon i Izzet Bana prezentaran (kon el akompanyamyento de un grande orkestro) el CD "Las Puertas" de los Pasharos Sefaradis
***
Venimos de resivir de la parte de muestro amigo Selim Salti, fundador del departamento para la Promosyon del Ladino en la Universidad Bar Ilan, el programa del proksimo Maraton ke tendra lugar el 7 Junyo 2006 en esta mizma fakultad i ke vos transmetemos tekstualmente:
"El dojen Marathon del Sentro Naime & Yehushua Salti de la Universitad Bar Ilan tendra lugar el 7 Junio 2006 en una de las salas de konferensia de esta institusyon. El unikunes de este marathon es ke todas las konferensias se van a dar de parte de muestros estudiantes de M.A. o Doktorat ansi ke de sus maestros. El ampesara a las oras 9 de la demania para eskaparse la tadre a las oras 18.00.
• Nivi Gomel (Doktora en serka) avlara sovre livros de ensenyansa del ebreo ke se eskrivieron en Ladino.
• Nitza Dori (Doktora en serka) sovre el periodiko 'el Makabeo" de Salonika.
• Tova Weisberg (M.A.) sovre Refael Elia Karmona i su ovra literaria en Ladino.
• Dra.Aldina Quintana BarAsher sovre los muevos aspektos y direksiones de la investigasyon linguistika en Ladino.
• Dov Kohen sovre el proyekto de la bibliografia mundiala de livros en Ladino.
• Prof.Edwin Seroussi, Dr Shmuel Raphael, Rivka Havassy vana prezentar el muevo livro de la Dra. Shoshana W. Shahak EN BUEN SIMAN, Panorama del repertorio musikal Sefaradi, ansi ke kantaderas kantaran kantikas autantikas de muestra lingua.
• Enfin Rachel Wolf estudiante en doktorat va prezentar su konferensia kurta sovre los povres i rikos de Izmir en el pasado.
• El fondo `Yosef Uziel` komo kada anyo dara 5 bekas a muevos estudiantes del Sentro, en prezensia de la familya Uziel.
Esto veramente kontente de ver ke mi vizion se realizo en poko tiempo i ke el Sentro por la primera vez va dar diplomas de doktorat a 2 maraviyozas estudiantes, ke renforsaran en un serka futuro el kadro de profesores."
***
Del 1 al 15 del mez de junyo, ekspozisyon de pintura de Virna Saul en la Galeria de arte "Leonardo".
Pinturas figurativas i partikularmente fokalizadas sovre la ekspresyon de la kara , envezes alegre, envezes triste, por la mas parte pensativle.
El Dyo ke mos ayege a syempre transmeter a muestros lektores "buenas i pozitivas novelas".
