Aslan I. PALACHI/Kanada
Bazada, en parte, sovre los rekuedros de su chikez, la primera ovra del Eskritor/rijidor de sinema, el Israelyano Nir BERGMAN, gana premios en los Festivales Internasyonales de Filmos en Yerushalayim, Tokyo, Palm Springs i Berlin. El argumento de este filme torna al derredor de un drama de famiya durante unos kuantos dias. La madre, Dafna, bivda i sola, esta kon difikultad engrandesyendo sus kuatro kriaturas despues de la muerte resyente de su marido. Eya lavora komo komadre en un ospital, resivyendo kriaturas de otras mujeres, myentres no es kapache de engrandeser su propya famiya i kumplir sus doveres. De edad entre 5 i 17 anyos, sus ijos no tienen sufizyente fuersa para afrontar los problemas de la vida.
Tomando en konsiderasyon ke la istorya del filmo se pasa en Israe1, la audensya nunka espera ke la muerte del padre fue kavzada por la punchada de una bizba. Es este punto, dize BERGMAN ke da sinyifikasyon a los spektadores Israelis . "Por la manera ironika de esta muerte torpe, kyero dizir ke ay muncha mortaldad komo esta en este pais." En una entrevista en un otel de Toronto, el rijidor ke tyene 34 anyos, eksplika ke su filme, a los de afuera de Israe1, reflekta komo un espejo la vida normal diaria de una famiya kon todos sus problemas i tambien sus esperansas.
Filmado en Haifa, en la vezindad ande nasyo i se engrandesyo BERGMAN, los akontesimyentos de su chikez fueron, en parte, la inspirasyon de esta ovra. El rijidor dize e en su djoventud nunka konsidero dirijir filmos komo una karyera. Kuando a los 23 anyos estudiava filozofia i estetika en la Universidad, uno de los kursos era teoria de filmos. La eksperyensa de filmar un video de las amigas de su ermana le dio la okazyon de ser akseptado a la mijor eskola profesyonal de filmo, ande agora aze parte del departamento de edukasian.
Lo importante en "Alas Rompidas" no es solo la manera natural ke los aktores djugan los persoaljes, ma tambien del sujeto ke se trata. El rijidor ke es tambien el eskritor de los dialogos, se interesa al estudyo de los atadijos entre individuos adyentro de la famiya mas de los problemas de la politika Israelyana. No ay dubyo ke la presyon de bivir en una grande sivdad moderna es una otra preokupasyon del direktor. BERGMAN kyere mostrar a su puevlo ke deven pensar en los individuos - Israelyanos o Palestinyanos – komo personas, no komo puevlo todo el tiempo. Segun el, esto es el punto de vista i el mesaje de su filmo.
Malgrado ke "Alas Rompidas" se filmo en Israel kon la partisipasyon de aktores Israelyanos, no se mensyona la politika aktual del Medio Oriente. Es un fakto ke la lucha kultural i relijioza de la rejyon es klaramente inyorada. En mi opinyon, esto es una kondukta apropyada, porke la ovra da importansa a la universalidad de los sentimyentos i a las eksperyensas ke sufren los personajes des filmo.
