Fue en una semana semejante, ke la Pajina Judeo-Espanyol del ŞALOM pyedro El ke (grasyas a su koraje, su asiduidad i su perseveransya) supo no deshar nunka amatar la flama luminoza de la esperansa i mantenerla syempre en vida..
La Ministra de la Politika Eksteryor Israelyana en Muestra Sivdad
Tzipi Livni Ministra de la Politika eksteryor Israelyana en Vijita Ofisyal en muestro payis no manko de vijitar tambyen la Sinagoga Neve Şalom i de entrar en kontakto kon la Komunidad Judia de Turkia la kuala organizo en su onor un torno en el Bosforo .
Eran prezentes el Embashador Israelyano Pinhas Avivi, el Konsul Jeneral Mordehai Amihai, el Konsul Moshe Kanfi, la delegada kultural Batia Keinan, el Gran Rabbino de Turkia Rav. Isak Haleva, el Prezidente de muestra Komunidad Silvyo Ovadya, el Prezidente Onoraryo Bensiyon Pinto ansi ke munchos notavles de muestra kolektividad.
Tzipi (Tzipora) Livni ija de Eitan Livni uno de los primeros deputados del Partido Likud, nasyo en Tel-Aviv en el anyo 1958, kumplyo su estudyos de "Derecho" en la Universita Bar-İlan, lavoro komo avokata durante dyez anyos i en 1999 entro a la Knesset komo deputada del Partido Likud .
Desde el anyo 2001 eya okupo konsekutivamente los postos de Ministra de la "Agrikultura" , del "Akolyo i İntegrasyon", del "Urbanizmo" , del la "Justisya" i aktualmente de la "Politika Eksteryor".
Tzipi Livni konsakro a la Turkia su primera vijita en tanto ke Ministra del Eksteryor, uno de sus eskopos es de fortifikar lo mas posivle las relasyones amigavles de su payis kon el muestro afin ke eyas sean fruktuozas i provechozas para los dos..
Moise Rahmani Fundador de la Revista "Los Muestros" fue Onorado
En un "komunikado de prensa" el Instituto Sefardi Evropeo anunsyo ke Martes el 23 del mez de Mayo, en la grande sala del otel Sheraton de Bruxelles, en prezensya de nombrozos diplomatos Espanyoles i Ispanikos el premyo "Acervo Cultural Ecos 2006" fue atribuido a Moise Rahmani por su lavor en favor de la Kultura Sefardi
Muestra alegria es grande de transmeter esta buena novela a muestros lektores. Moise Rahmani es una persona muy estimada en el kampo del Sefaradismo por la grande kualidad de su lavoro i sus esforsos
İninterrumpidos en favor de la promosyon del patrimonyo kultural.
Todas muestras felisitasyones a Moise Rahmani al kual auguramos reushita kumplida en todos su proyektos.
