Klara PERAHYAMyerkoles la tadre el 24 del mez de Mayo, en la kayente in tan konvivyal atmosfera del Instituto Cervantes, su direktor el Dr. Pablo Martinez Asuero organizo una "konferensya-egzibisyon" konsakrada unikamente a timbres postales Sefardis , konferensya partikularmente interesante por su sujeto, su kontenido i en mizmo tyempo la metikulozidad i el amor kon los kualos eya fue aparejada i prezentada por el koleksyonador Mordehay Ar
Şeli GAON
Keridos Lektores,
Antes un mez en el enterval de la fiesta de Pesach; mi madre tuvo una envitada muy presyosa, valutosa i muy kultivada.
Madam Tanya Bahar ke es la madre de Emel i Prof. Dr. Mois Bahar, una mujer bien aedada, muy aklarada i la avla ke tiene; da plazer al d’en frente.
Eya se akodra de los evenemyentos de antes de noventa anyos, komo si paso ayer. Akodrandomos del pasado izimos una kompetisyon sovre las poesias ke me aviya ambezado en la escuola Sainte Pulcherie, i vos puedo dizir ke se akodro de todo modo de detalyos.
Agora vos kero kontar una konseja muy enteresante ke mos konto en fransez.
El meyoyo kon la shans se izyeron amigos i se toparon en un kampo.
La shans dicho ke eya da la moneda, la vida buena i la abondansa a las personas.
El meyoyo le respondyo "Si yo no egzisto tu no vales nada", i se empesaron a discutir.
En supito vyeron un pastor (çoban); tanyendo kon su fluta (kaval), i koriendo de detras los kodreros en los kampos. El era una persona oroza, teniya una vida simple, se iva kada dia kon eyos a los kampos, komiya i beviya la leçe de los kodreros i no teniya dinguna ansya. El se kontentava de esta vida.
Le dicho el meyoyo a la shans; este pastor ke esta solo no tiene mas ke pensar de azer otra koza en la vida, i la shans lo tomo al çoban i lo entro en una kaverna. Aya aviya munchas coyas; el povereto d’el pastor no saviya la valor i kualo es las djoyas, los tomo a los kodreros; a todos los encoyo, en metyendoles a la kavesa, a las manos, a las orejas estas coyas i empeso a kantar kon la fluta, i a kaminar en el kampo.
Una persona pasando por aya vido los kodreros encoyados, i se dicho de si par asi : "Este pastor ke es tanto prove, de ande le vino esta rikeza?..."El arrovo al pareser el trezoro d’el rey".
İ esta persona se fue a la sivdad i konto a todos lo ke vido.
Los sivdadinos lo apanyaron al pastor i lo entregaron a la polisia. La polisia lo kastigo de arrovar las coyas d’el rey.
Kuando le estavan demandando demandas sovre las coyas, el no teniya la posibilitad de defenderse i no estava puedyendo responder.
Le dicheron ke lo van a enkolgar. El no teniya la entelijensya para defenderse.
Alora ande esta la shans?
A la fin el pastor le kuadro a mostrar la grota ande estavan las coyas i lo decharon libero.
El no tenia menester de la shans porke ya estava orozo en su vida simple.
"SİN LA ENTELİJENSYA, LA SHANS NO VALE NADA. ES LA ENTELİJENSA KE DİRİJE LA SHANS".
Estamos entendyendo a la fin de esta konseja ke kale tener todas las qualitades encuntos, kada koza depende de la otra.
Mersi muncho kerida Tanya Bahar, por la ermoza konversasyon ke tuvimos. Tomimos muncho plazer.
Sana i rezya ke estes, i al vermos...
