Klara PERAHYA
Dos kozas me pushan a eskrivir este artikolo... el de alkavo akto de antisemitizmo en Paris (ay de esto dos semanas) en la rue des Rosiers de la parte de mansevos Afrikanos no muzulmanos... i la ultima emisyon televizada de Pierre Elkabash sovre "l’affaire Dreyfus", un debate entre historyanos i Juristos de alto nivel... A un syerto momento uno de los partisipantes izo la remarka sigyente: "Dreyfus era un ombre de muy fuerte karakter, un otro ke el no podria arreyevar lo ke fizikamente i moralmente el sufrio; el fakto es ke el devia sovrebivir para pueder testiguar".
Por seguro ningun raporto entre los dos kavzos. El ansyano muy grave, el aktual de manka importansa ma muy sinyifikativo. Mas de un siglo los separa... Espasyos sosyales enteramente diferentes, el uno Fransez i Kristyano el otro Afrikano... el primer en la alta esfera militar i intelektual de la Fransya de 1896, el segundo al seno de la masa popular de emigrantes venidos de payizes leshanos... ma un punto komun entre eyos: "la fuerte anti-patia" enverso los Judyos
Kon su enorme varyedad de emigrantes, la Fransya es aktualmente un djenero de immenso laboratoryo sosyo- psikolojiko ande se puede estudyar la tenasidad de syertas reaksyones umanas, entre otras del antisemitizmo sin razon propya ni motivo reel de provokasyon.
Es ansi ke dos semanas antes, un grupo nombrado "grupe KA" (kompuesto de mansevos, emigrantes o ijos de emigrantes de la Afrika) fue en la "Rue des Rosiers", kuartyer espesifikamente djudyo, para manifestar sin razon su inimistad kontra muestros korelijyonaryos.
La ija del patron de uno de los restorantes "Kasher" ke se topa en esta kaleja fue kestyonada por Aroutz Sheva korespondyente de una gazeta Israelyana. Eya konto ke los agresores gritaron "Mort aux juifs" (muerte a los judyos). Ningun akto fiziko de brutalidad no fue perpetrado, solo palavras i atitudes provokantes komo el indisyo de una amenaza. Eyos estavan bushkando myembros del Betar o de la Liga de defensa Judia afin de pelear kon eyos.
El fakto no kedo eskondido, las institusyones anti-rasistas intervinyeron, partikularmente la ADL (Anti Difamation ligue), multiples artikolos paresyeron en la Prensa, el Ministro del interyor intervino personalmente de una manera bastante fuerte... Lo mizmo en muncho muncho mas grave se avia produzido unos kuantos mezes antes, en el kavzo de İlan Halimi, el kual malorozamente fue salvajemente matado.
Nada de terrivle esta vez, ma la repetisyon regular de semblavles manifestasyones de inimistad mos desha perpleksos ...En el kavzo aktual no se trata de un krimen krapulozo, ni de un antagonizmo provokado por el problema Israelo-palestinyano, los agresorer no syendo ni arabos ni muzulmanos ni espesifikamente konsernados por esta kestyon. No se trata tambyen de un djesto de revolta kontra una injustisya sosyal, las personas vizadas syendo komo eyos mizmos "personas del puevlo", lavorantes o botikaryos.
Puede ser un komplekso de inferyoridad, una rankor syega del ke no reusho o del ke no izo nunka el esforso nesesaryo para reushir enverso el ke mas o menos parvino .
Ay siglos kel mizmo fenomena se produze i se reproduze, en kontekstos historikos i kulturales diferentes, provokados kaji syempre por varias kreensas relijyozas o prejuisyos rasyales... Lo topamos a diferentes niveles en el ombre de la kaya komo en los savyos los mas reputados. Heideger no protesto nunka kontra el nazizmo, Renan era antisemito... Nietche i Wagner desveloparon el tema mitiko del "Ombre Aryano superyor"... numerozos intelektuales anti-dreyfuzardos se apresuraron de kondanarlo, malgrado sus afirmasyones de inosensya i los indisyos ke konfirmavan la verasidad de sus palavras.
De muevo la mizma kestyon ke syempre keda sin repuesta: "Deke este aborresimyentlo ke nada puede justifikar? Deke este menospresyo, komo una fatalidad de la kuala muestro puevlo no pudo ainda deskabuirse enteramente? Portanto es el solo ke puedra responder un dia a esta pregunta.
Por el momento el tyene el dever de sovrebivir en tanto ke Judyo, komo lo izo Dreyfus afin de testimonyar i syempre defender sus valores, "Ser syempre bastante fuerte para pueder defenderse sin nunka atakar"... Esto sera su desfio i su mensaje adresado a la konsensya umana.
