En el onzen i dodjen siglos, en munchos lugares de la Espanya Muzulmana, los djudios eran ovligados de pagar grandes taksas para pueder kontinuar a bivir aya. Este estado forso munchos djudios a emigrar a la parte kristiana.
Las otoridades kristianas instalaron a los djudios ke vinyeron de la Espanya Muzulmana, en las frontieras, para aprovecharsen de sus lingua i kultura araba, de sus eksperiensas, i de sus diversos talentos.
Los djudios djugaron un grande rolo en el estado ekonomiko de la Espanya Kristiana. Eyos fueron djente de konfiensa, onestos i fidelos. Los kristianos ya saviyan ke los djudios teniyan grandes talentos kulturales, konosiyan munchas linguas, i lo mas importante, eyos eran muy kapache en los echos de moneda.
En el tredjen siglo, una grande parte de las tierras muzulmanas pasaron a la mano de los Espanyoles Kristianos. En este siglo, los djudios obtuvieron importantes postos en la administrasyon de los reynados, espesialmente en el reyno de Aragon.
Akeyos tiempos, munchos djudios eran patrones de kazas, de terrenos i de vinyas. En akeyos anyos, no aviya dinguna limitasion por eyos para obtener propriedades. La abundansia de las vinyas de akeyos anyos esta amostrando ke munchos djudios moravan en los kazales, biviyan libros afuera de las sivdades, i se okupavan de agrikultura.
Los djudios ke moravan en las sivdades eran aktivos en el komersio interior i en el komersio ekterior. La majorita de eyos eran komersiantes reushidos. Aviya djudios ke eran doktores, farmasienes, avokatos, profesores de eskola, rabinos, hazanes, djuzgos, diplomates i traduktores de livros. Munchos de los traduktores traduzian livros i dokumentos del arabo al espanyol, i del espanyol al arabo. En akeya epoka, uvo tambien munchos ekrivanos i poetes djudios.
Komo en kada epoka, en akeyos diyas, los djudios eran muy nombrados en el kampo de las finansas. Eyos emprestavan moneda mezmo a los reyes, finansiavan grandes kantitas de moneda por las gerras. Miembros de la aristokrasia espanyola aziyan echos de finansas kon los djudios.
Arrekojer taksas del puevlo era tambien el ofisio de los djudios. Los reyes tenian grande konfiensa en eyos i por esta razon, los djudios tuvieron muncha fuersa i influensa en los echos de finansas.
Komo estomos viendo, akeyos tiempos aviya djudios de kada klasa. Unos apartenian a la burgezia, otros eran aristokrates i intelektuales. Ma esto no kere dizir ke todos los djudios eran rikos i intelektuales. Komo en kada sosiedad, i entre eyos aviya artizanes i ovreros.
Komo lo savemos todos, el djudio fue siempre laboriozo i armoniozo para pueder bivir repozado en la Diaspora. Eyos fueron reushidos en la Espanya Kristiana de la edad media en kada ofisio ke izyeron ma solo en los anyos ke pudieron bivir libros en tanto ke djudios, sin tener dinguna limitasion.
