Syertos investigatores (araştırmacı) pretenden ke un mansevo de Virginia, John Dowdy, kijo arregalar de esta manera su padre ke se aviya okupado el solo de la famiya, a la muerte de su mujer. Otros afirman ke, William Smart, un veterano de la gerra sivil, pyedrendo su mujer engrandesyo sus 6 ijos sin dingun ayudo. Alora, su ija, pasando anyos, penso onorar su padre. Ansi se realizo la primera selebrasyon en el 19 Junyo 1910, en Washington.
En 1924, sin ser enteramente ofisyal, el Diya del Padre se selebro kon el apoyo del Prezidente Calvin Coolidge. Fue solamente en 1966, ke el treser diya de Alhad, se proklamo ofisyalmente komo el Diya del Padre, i se ampeso a selebrar kaji en el mundo entero.
Yo, syempre tuve la impresyon ke este diya kedo un poko en la solombra del Diya de La Madre. Deke? Es difisil de eksplikar. Aki no kero ke ayga malentendido: es el diya, i no los padres ke kedan en la solonbra!... El padre, idolo del ijo, primer amor de la ija, komo puede kedar en la solombra?? No me plaze muncho el titolo de "shef de famiya", ke atribuen muy frekuente al padre. A mi opinyon, esta en kontradiksyon kon la nosyon de igualidad (eşitlik kavramı ile çelişkili) entre los doz djenitores. Ma yo puedo afirmar ke el padre es el "Pilar," el simbolo de siguridad, el giador (djuntos kon la madre) i el protektor de la famiya.
Un psikologo disho: "En la peryoda de engrandesimyento del chiko, los padres estan mas muncho enterasados! kon la vanda "distraksyon". Les plaze djugar kon el bebe, ma, no las angaryas komo trokar, alimpyarlo, durmirlo, darle a komer ets... En jeneral, la madre okupandase del mirado del chiko, aspera a lo menos, ke el padre lo distree."
Sinseramente, yo no esto de la mizma idea. Los mansevos de agora, o, una grande majorita, estan mas konsientes de sus doveres, si se puede dezir ansi. No estan egoistos o insensivles (vurdum duymaz).Estan reushendo a dar un ayudo efikache (etkili) a sus kompanyeras. Es muy normal, i mizmo, djusto, mas i mas, si marido i mujer estan lavorando. Aktualmente, el ideal de una muchacha es un marido tenyendo la kapachita i abilidad de una madre en la edukasyon i engrandesimyento de los ninos.
Okuparse de las kriaturas no deve ser una angarya para el padre. A la kontra, sintirse serka de sus chikos, verlos engrandeser de diya en diya, es una grande eksperyensa. Kada chika deskuvyerta, kada muevo marafet del bebe, es un plazer i una maraviya para el (siguro i para la madre). Entrando en edad, puja la importansa del aserkamyento entre padre i ijos.
El padre apartando bastante tyempo a sus kriaturas, enteresandose a sus chikos problemas, esta echando sin dubyo, un "temel" rezyo para sus futuras relasyones.
No es sola yo ke penso ansi. Bazandosen sovre bushkidas i eksperyensas, los profesyonales arrivaron a esta konkluzyon: "La kriatura, desde su nasimyento se esforsa a estableser un atamyento sosyal kon el mundo eksteryor. I, lo ke reushe muy byen! es imitar
los grandes. Par konsekuensa, la largor i manera del tyempo ke los chikos van a pasar kon el padre, los komprtos resiprokos, son muy importantes."
Agora, kero sitar un proverbo Djudyo, ke kaji todos konosemos, i lo sintimos vezes, i vezes: "Kuando da el padre al ijo, rie el padre, rie el ijo. Kuando da el ijo al padre, yora el padre, yora el ijo..." Bueno, vos djuro, keridos amigos, nunka pude dar un senso a estas palavras. Por siguro ke en kada proverbo se eskonde la sezudeza de muestros padres, i ansestros. Me esta paresyendo ke se puede azer munchos komentaryos sovre el proverbo. Alora, esto lo va deshar a los lektores. Kada uno es libero de komentar a su modo!... Sueto selebrasyones alegres a todos los padres, chikos i grandes...
