Ninet BİVAS
Orijinaryo de Asia menor (Anadolu), la azetuna se kultiva desde la mas remota (eski) antiguedad en todo el Mediteraneo. Fue introdusido a los otros paizes por los Fenicianos i Gregos. Los Romanos expandieron su kultivo i mejoraron las teknikas de produksyon de su fruto eksprimido: la azete de oliva. El arvole muy ramifiyado (dall_) puede alkansar 10 metros de altura, su kolor es gri i su matiera es muy dura.
El azete de oliva a sido aparte de la alimentasyon, un simbolo relijyozo, medisinal i nutritivo. Los reyes, atletas i rezin nasidos se serviyan de esta azete. Se utilizo komo kombustible para las lamparas de los templos.
La invazyon Araba
en Espanya kavzo la ogmentasyon de su kultivo i perfeksyono las teknikas de obtansyon de azete. La palavra espanyola "azete" proviene del Arabo "al-zait" ke sinyifika " sumo de azetuna".
La azetuna fue yevada al "Nuevo Mundo" por los Espanyoles durante los siglos XVI,XVII.
Konsomar azete de azetuna tiene grandes benefisyos para muestra salud. Es riko en vitamin E, betakarotenos i otros antioxidentes: abasha el nivel de kolesterol, amengua el risko de enfraktus i los asides gastrikos, es mijor absorbado por los intestines, es bueno para los uesos, konviyene para el envyejesamyento de los organes en jeneral. Sus ojas tanbyen se utiliza para azer kuras.
Lo maz importante es:La azetuna ez konsiderada komo simbolo de la paz.
