Klara PERAHYA
La semana pasada el ŞALOM anunsyo la reushita al nivel universitaryo de
Mirel Çiçekli
Sezin Eskenazi
Roslin Pardo
Hay Eytan Yanarocak
ke vinyeron de obtener sus diploma de fin de estudyo; mansevos briyantes, la kavesa syempre yena de muevos proyektos, kolavoradores aktivos de muestra gazeta, a los kualos oguramos realizasyon de todos sus dezeos.
Oy, yo me kero adresar no solo a eyos ma tambyen a todos los ke, a ke nivel ke sea, entran en un muevo sistema de vida en asumando muevas responsabilidades.
Oy, para eyos, es el momento de una syerta independensya de aksyon, la posivilidad de eskojer un muevo kamino i de ser munchas vezes ovligados de tomar solos sus desizyones.
A eyos kero dezir:
Estash por ansi dezir delantre el portal de lo ke sera reelmente vuestra vida...es en la plenitud munchas vezes difisil de la libertad, ke empesa la verdadera lucha, lucha no solo kontra los otros (amigos o enemigos) ma kontra vozotros mizmo, kontra (a syertos momentos) el deskorajamyento, i tambyen kontra la loka borachez ke da envezes la reushita muy rapida... lucha kontra la tentasyon de los eskopos eskojidos solamente por ke son fasil a alkansar i del falso brio de los suksesos asigurados de antes.
No vos olvidesh ke kual ke sera el paso ke darash, el no sera nunka eternalmente definitivo i ke a kada momento puedra aver la posivilidad de retornar al punto de partensya.
"Tener el koraje de reempesar " es a el solo un empesijo de reushita... nada es irremediavle, ninguna falta, ninguna desfecha... tambyen nada no es definitivamente asegurado, ninguna reushita, ninguna viktorya. Kada dia es un empesijo muevo... la posivilidad de kontinuar o de renunsyar... i no son solas las sirkunstansyas ke desidaran ma lo ke ay en vozotros, lo ke estash prontos a dar de vozotros mizmo.
El buto no es de ganar kontra los otros, ma kontra la parte de ombra ke ay en kada uno de entre mozotros. No kedar estatikos ma tambyen no sigir a la syega el koryente del dia, sin por esto kedar enserrados por simple tradisyon en los vyejos preseptos ke ya devinyeron kadukos.
Lo ke kale es "bivir el tyempo prezente sin todo akseptar ni todo refuzar otomatikamente", "saver ser kritiko sin ser destruktivo, ser otokritiko sin ser pesimisto o alarmisto", "no kedar serrado a los otros ma al kontraryo ir verso eyos... El vyejo komo el mansevo, el savyo komo el simple ombre de la kaye tyenen una koza a transmetervos, un mensaje, un egzempyo, la sagasidad de sus eksperyensas o la freskor de sus pensamyento diferente del vuestro.
No vos olvidesh ke todos semos mortales, ma ke mos fue dado un "pedaso de tyempo" al kual solo mozotros tenemos la posivilidad de dar un senso... Eskoje la verdad, la amistad, la solidaridad i la komprensyon mutual. No es unikamente la reushita ke es importante, ma la kualidad de la reushita... es esto ke vos kalifikara.
