La Ventana de Vuestra Ermana

ªeli GAON

Esto kontinuando a las konsejikas nostaljikas de la muy estimada i onorable Tanya Bahar.
El ijo de un gevir (sinyor) riko era muy flako i el padre se ansyeava muncho de esta flakeza. Era un ijo regalado i komo el teniya muncha moneda; mirava de aremedyarlo en yevandolo a todos los medikos diferentes, ma no se estava topando la melizina.
Teniya un doktor de famiya ke lo kurava, ma no era posible de entrar en karnes.
El padre se estava desesperando. El mansevo en tenyendo 18 anyos, oyo avlar su padre kon el doktor, ke nunka se vazer bueno.
El ijo se fue al padre i le dicho ke antes de murirse kere viajar i ver el mundo.
El padre le aparejo una karosa kon kuatro kavayos, aryento kon una kamareta, dos lugares d’asentar, la kama i todo custo i una remorka de detras.
Akompanyado del moso ke lo engrandesyo i siguramente kon muncha moneda.
El padre morava en un kazal.
El ijo i el moso se metyeron al kamino kon el landon (araba).
A kada lugar ke se ivan demandavan kualo era makpul en akel kazal?
En el primer le dicheron ke la halva es muy makpul i el mansevo komyo la halva i se metyo al kamino.
En el sigundo kazal ke arivaron dicheron ke el kezo era makpul i el komyo d’el kezo.  Se kedava dos tres dias en un lugar i kontinuava al kamino.
Este modo paso el enverano i ya vinyeron al invyerno.
Arrivaron al kazal ke era situado en una montanya, no aviya djente, i komo era muy yelado, el puevlo biviya debacho la sivdad en las kavernas.
Salyo un vyejo i les dicho ke el solo mora aya i la mujer le manda a komer de abasho.
El mansevo le demando;" kualo era makpul de komer aya?"
El vyejo le respondyo ke no aviya nada, ma bushkando topo un kaldo de trushi en el dip de una tinaja ke estava enterrada en la tyerra.
En una kupa le ofryo al mansevo.
Akeya noche se kedo en este kazal i a  la demanyana le demando otra kupa de kaldo de trushi ke le plazyo muncho.
Este modo paso un mez , el mansevo se kedo aya i se empeso a enfuerteser.
Tanto s’envisyo ke empeso a konduizar la karosa, el ombre se ermozeyo.
Kuando el kaldo se termino desidaron de tornar a la sivdad d’el padre. Kuando se rankontraron, el padre estuvo tresalido de ver al ijo ke s’engodro.
El doktor le demando al moso komo fue este evenemyento; i el moso le konto todo el viaje ke izyeron.
El doktor tomo al moso  i se fue a este kazal. Arrivo al kazal ande estava el vyejo i le demando la tinaja. El doktor tomo un fener i vido en la tinaja del kaldo de  trushi ke aviya una madre de kaza (kulevra). Las kulevras grandes durmen en invyerno i salen en medyo en enverano.
El doktor torno atras i le dicho al padre: "La melizina de tu ijo era el tosigo de esta kulevra."
Ez una koensidensya ke un tosigo se puede azer la melizina de una persona.
Kedavos en la buena ora, vozos tambien i mozos tambien.