SER ORGANIZADOS

"La vida no es kurta, es mozotros ke la azemos tala." (Refleksyon  anonima.)

Coya DELEVİ

La Bruyere disho: "Los ke se keshan de la kurteza del tyempo, son los ke no lo emplean byen." Ganar un poko de tyempo!...Es el buto i el dezeo de la majorita de las personas. Komo se puede alkansar a este buto? Naturalmente, en empleando kon ekonomia las oras i afilu los puntos. En una manera, ser eskasos kuando se trata de muestro tyempo, syendo ke no egziste dingun remedyo de alargarlo. No puedemos tambyen, traer atras los diyas i las oras ke pasaron…
Sintimos munchos, kesharsen ke las oras no les estan abastando, ke estan unas, ensima de otras. Se keshan de la kurteza del tyempo, aunke se alevantan temprano, i se echan tadre. Ay otros kon este djenero de keshas: "Mis ovligasyones estan pujando, tambyen, mis responsabilidades. Mi mujer se esta keshando de no verme, i esta dizyendo ke eramos mas orozos antes."
Estas personas adjustan, ke no tyenen tyempo, afilu de repozarsen, o de azer unos kuantos diyas de vakansas. Yo lo ke puedo, es responder kon esta refleksyon de Ernest Hello: "Lavorar es muy simple, ma, repozarse?…Ayi esta la difikulta!"
Komo se puede topar tyempo sufizyente para todo? Siguro, ke no es tan simple, i muy fasil. En un diya normal, topar tyempo para kada koza, en dando la prioridad a lo mas importante, es, dunke, una kestyon de organizasyon.
La persona dezorganizada, pyedre tyempo en baldes, no reushe a azer todo, i esto la aze nyervoza. A la kontra, kon un poko de organizasyon, kon kalmo, se gana tyempo, se produize mas demaziya. I, esto, sin ser ovligados de alevantar demanyana, a medyo durmyendo!, o echarse muy tadre, muertos por durmir i kansados. Es reelmente importante de tomar el esfuenyo menesterozo.Esto puede ser la garansiya de empesar el diya siguiente, kon buena umor i byen repozado.
Es provechozo de konoser las okupasyones prinsipalas del diya, i meterlas en un orden, si posivle. Aki, una dicha sinyifikante de Anatole France: "La egzistensya umana es kurta. El ombre es maestro de su tyempo, solamente kuando lo diviza en oras, en minutos i segondos. Kijo dezir, en parselas proporsyonadas a la kurteza de la vida."
Dunke, estamos avlando de organizasyon, i, en una mezura, de dishiplina, ke, kon tyempo, se puede transformar en uzansa. Por egzempyo, si tenesh ovligasyones  a oras fiksas, es preferavle aparejar de una noche antes, lo menesterozo. Es tambyen, una buena idea, de notar las ovligasyones, kestyones o okupasyones primordyalas. No se deve pensar ke semos kapavles de realizar mas demaziya del "maksimum." I, en prinsipyo, no devemos depasar el limito de muestras fuersas fizikas i kapachita mental.
La persona ke acheto esta dishiplina, kualas ke seyan sus okupasyones, o su estado fiziko, ya echo un grande paso en el kamino de la reushita. Meteremos el punto final kon unos, doz versos miyos, ke son tambyen, buenos konsejos.

LOS ANYOS ME AMBEZARON
Kon los anyos sos buen amigo,
Si, kon meoyo tu los bives.
El tyempo devyene tu enemigo,
Si no lo empleas komo lo deves.
No puedes tener los diyas, las oras,
Bivyendolos azete muy eskasa,
Tomas prekosyones, i no yoras,
Si ves ke presto el tyempo pasa...
Me tomo anyos por ambezar esto,
En el kamino, emblankesi mi kaveyo,
Kon la vida aze i tu un pakto,
Es un buen konsejo ke yo te do!..
                                           C. D.