Kaji todos ya konosen la istorya de este drama provokado en grande parte por el antisemitizmo, la larga sufriensa de este ofisyal inosente, leal enverso su patria i falsamente inkulpado de traisyon, sin ninguna prova reelmente tanjible, su egzilyo debasho el sol kemador de la "Isla del Diavlo", la deskadensya de una famiya muy onoravle , la dolor de su mujer ... Kaji todos meldimos varios artikolos sovre el refuzo de la Korte Judisyal de revizar el procheso malgrado los indisyos de inosensya de dia en dia mas konkretos, la lucha insesante de su ermano konvensido de su inosensya, el ayudo del grande djornalisto Bernard Lazare i enfin el sublime "J’accuse" de Emile Zola.
El evenemento fue por seguro de grande importansa para la Fransya , la onor de su armada fue manchada, una enorme polemika divizo el payis en dos ... grande fue la konsekuensa de esta falta ke oskuresyo por un syerto tyempo su facha.
"El kavzo Dreyfus" fue de una parte la atestasyon irrefutavle de un "odyo feroz enverso los Judyos" en el korason de una enorme kuantidad de Fransezes, i tambyen de otra parte, para munchos de muestros propyos korelijyonaryos de la esfera sekular, kaji asimilados a la manera evropea de bivir, pensar i ser, el despertamyento de la konsensya djudia, el punto de partensya de un presentimyento de apartenir a una entidad partikular, kon su pasado istoriko, su patrimonyo kultural, el sentimyento ke en ke payis ke sea, ahuera el suyo mizmo < ainda inegzistyente a esta epoka>, eyos o sus ijos seran fatalmente molestados.
Los premisyos de esta idea ya egzistia por seguro desde siglos en la sensivilidad relijyoza Judia... kada anyo se repetava de una manera otomatika, puede ser sin reelmente kreer: "este anyo aki, a el anyo el vinyen en tyerra de Israel".
Kual ke fuera el grado de atamyento i de lealdad enverso el payis de avrigo, en un kanton del korason de la mas parte de judyos relijyozos i no relijyozos, uvo syempre la esperansa (munchas vezes konsiderada komo utopika) de un estado judyo
"Simple koensidensya de la fatalidad" o puede ser "Voluntad de una Fuersa Okulta", al momento de la terrivle pelea ke divizava en doz no solo la klasa administrativa o intelektual ma el puevlo Fransez el mizmo , se topava en Paris un estranjero , djornalisto, eskritor i pensador Austriako de orijen judia, ijo de un padre liberalisto i partizano de la asimilasyon ...el mizmo, Theodore Herzl, a un syerto momento, delantre la sertitud de un antisemitizmo irreduktivle, penso (komo solusyon) a una konversyon global de la mansevez Judia al kristyanizmo.
Poko despues, undido en la meskla popular de las manifestasyones anti-Dreyfuzardas, en la klamor de aborresimyento, ande se oiya, repetido komo un grito de vengansa: "muerte a los judyos", "muerte a los judyos", el se rendyo kuento ke la konversyon no era la buena solusyon i alora se konkretizo en su esprito (komo una obsesyon ke mas nunka no devia desharlo repozado) la idea de un estado Judyo ke iva realizar las vyejas aspirasyones ansestrales.
La Fransya se aparejo a selebrar el sentenaryo de la reabilitasyon de un Judyo viktima de una indjustisya judisyal, lo ke la onora i afirma su lucha por la sovraguardya de los derechos del ombre , i mozotros Judyos fyestaremos en muestro korason, el sentenaryo o kaji sentenaryo de lo ke fue los primeros premisyos de un verdadero i konkreto Estado Ebraiko, ande kada judyo se puedra konsiderar reelmente "sitizano,en su totalidad" kon sus derechos i sus deveres.
