En su avla de inogurasyon, bazada sovre el tema:"la libertad de ekspresyon en el dialogo entre las relijyones i las varias kulturas", el Primer Ministro Turko Recep Tayyip Erdoğan , Vice-prezidente de la "Aliansa de las Sivilizasyones" defendyo el punto de viste ke kale absolutamente eliminar todo modo de prejuisyo i espandir el esprito de toleransya en evitando las agresyones kontra las valores relijyozas de otros puevlos...El adjusto tambyen ke la "İslamofobia" es una falta kontra la Umanidad igualmente grave kel "antisemitizmo".
Despues de la konferensya, endjuntos kon "René Van Der Linden" Prezidente del Konsilyo Parlamentaryo Evropeo , Recep Tayyip Edoğan avyo la ekspozisyon de fotografias dando una vizyon de la vida Judia en el İmperyo Otomano ansi ke en Turkia. El Primer Ministro disho alora ke "A una epoka durante lakuala los Judyos eran oprimidos, eyos toparon avrigo i proteksyon sovre las tyerras Turkas. Ansi eyos pudyeron konservar sus relijyon, kultura i lingua asta muestros dias.
A su torno Naim Güleryüz, Vice Prezidente del "500. Yıl Vakfı" ansi ke fundador i koordinador del Muzeo Judyo de Turkia , tomo la palavra i afirmo ke desde el anyo 1326 la koabitasyon armonyoza de los Turkos kon los Judyos puede servir de model i de simbolo a la Umanidad.
Entre las 38 fotografias ke kompozan esta egzibisyon, syertas de entre eyas reprezentan selebres Sinagogas, komo Neve Şalom, Ahrida, el kal Ashkenaz, las kilot de Hasköy i de Adana, i tambyen las eskolas komunales Judias de Kasımpaşa, Ankara i Edirne, diversas seremonias de kazamyentos , titolos de varios artikolos publikados en el ŞALOM i el AMANESER etc..etc.. ansi ke fotografias de syertos diplomatos ke salvaron la vida de munchos Judyos durante la Segunda Gerra Mundyal.
