La Ventana de Vuestra Ermana

Şeli GAON

Keridos Lektores,
Ay doz mezes ke esto eskrivyendo las konsejas de Tanya Bahar.
Oy, kije trokar un poko i kije partajar kon vozotros la seremoniya keme fyestaron en Barınyurt; a la okazyon de la transmisyon del poder prezidensyal.
Antes trenta anyos empesi a lavorar komo volontarya en muestra komunitad en el grupo Gönüllü Hanımlar. En el enterval fui aktiva en el Dostluk Yurdu Derneği, en Fakirleri Koruma Derneği, i antes oço anyos mos embiyaron al Barınyurt kon otros volontaryos.
Este lavoro muy sakro a mi aviso sureyo fina oy.
Kada demanyana sali kon mi marido komo iyir al eço i torni mas tadre de el, ma lo ize kon un plazer muy grande; porke la trankilitad de la konsensya a la torna a kaza era una satisfaksyon ke no se puede eksplikar kon byervos, porke Barınyurt fue para mi una sigunda kaza, ke no me manke mi famiya.
Ay doz anyos ke fui la prezidente de la Matan Baseter – Barınyurt. Antes un mez fue la seremoniya de la transmisyon del poder prezidensyal i fue la fin d’el mandato d’el dover de esta misyon sakra.
Estava muy emosyonada; prepari un diskorso,i veramente eskrivi lo ke senti en estos oço anyos, komo lavori kon muncha ardor, komo luçi de aryento del korason.
Mi penseryo ez; ke kuando se toma una responsabilitad, kale azer lo fina la fin. Esto ez la fason del lavoro miyo.
Yo penso ke; la esperansa es la vida, la vida es la kerensya i la kerensya es la solidaridad.
Kale dar mano kon mano todos los volontaryos, ser aunados para reuşir i para adelantar la organizasyon.
Esto es el buto del lavoro volontaryo.
La reuşita es ; el rezultado d’el lavoro, de la veluntad i de la konfiensa.
Los menesterozos de la Matan Baseter i los pansyonaryos del Barınyurt; son atados a las desisyones ke vana tomar los dirijentes de la organizasyon.
No kale ser kruelos; kale tener el sentimyento de ayudarles el karar ke lo meresen, porke entre eyos ay munchos ke saven demandar en tenyendo, i profitar, ma par kontra ay munchos ke sufren i no saven demandar, i guadran sus miseryas.
De toda manera, el buto de Matan Baseter es ayudar a este modo de cente i akudirlos.
Este dia fue; para mi, mi famiya i toda la asistensya, muy emosyonante i muy bien organizada.
Despues de una semana tuvimos el aniversaryo de kazamyento de 30 anyos.
Mi ija Esra, i mi ijo İlker mos izyeron un surpriz parti. Fin a la fin no tuvimos dingun dubyo de lo ke mos aparejaron.
Los ijos mos dicheron ke mos estan envitando en un restorante para fyestar el aniversaryo entre la famiya.
A las oço de la tadre mos dyeron randevu en el Bosfor sin dar el nombre del restorante. Mi ijo vino a muestra renkontra en el bodre de la mar en Bebek.
Alkilaron una nave (tekne) luksuoza; mi ija salyo de aryento de la nave i mos dicho de entrar.
El kapitan mos resivyo en ayudandomos para suvir. El ijo metyo un CD kon una muzica romantika paral venido bueno i klaro de los novyos. Ofriendomos las bevyentas, la nave debarko d’el bodre de la mar en las onduras d’el Bosfor.
Mos afito una noçada maraviyoza, el lunar briyando akompanyado de las estreyas parpareando; la mar kalma, i kaminimos los dos bodres del Bosfor, en alumbrandomos de las luzes de los dos pontes ke estavan refletando enriva la mar.
En el enterval de una ora ke pasimos restorantes, kafes i villas muy luksuozas, ke azen plazer de ver; las bevyentas en la mano kon mi marido i ijos, estavamos en los verjeles.
Arivimos a Beykoz, akostimos aya i empesimos a komer kon la muzika de muestra manseves en fransez i en espanyol.
Mos aparejaron una meza muy delikada i savroza kon los vinos, i savoreyando la vista i el komer, no supimos komo pasaron las oras.
Ke ermoza sivdad es Estambol, sovre todo la noçe!... Es una perla valutosa...
A las 12 de la noçe la sigunda surpriz. Un gato forma de korason i yena de rozas de şokola i fruta, kon las kandelas.
Avrimos un bokal de şampanya i mos oguraron una vida orosa,kon sanedad, prosperitad i todos encuntos.
A las una de la noçe arivimos a Bebek i tornimos a muestro nido kon grande alegriya.
Lo ke ensembrimos lo rekoltimos bendiço el Dyo...