Dos emisyones televizadas

Klara PERAHYA

Ay de esto unos kuantos dias el kanal de televizyon Franko-Alman “Arte” dyo una serie de emisyones  sovre la biblia  ande fue espesifyado ke no se topo asta agora ningun vestijyo arkeolojiko atestando la otentisidad de syertos faktos relatados en el Livro Santo.
No tuve malorozamente la okazyon de segir personalmente esta emisyon, ma los argumentos desvelopados syendo bazados sovre indisyos syentifikos, nombrozos amigos la toparon muy interesante.
Por seguro estos savyos son absolutamente sinseros en sus afirmasyones  i no ay dubyo ke del punto de vista istoriko, la verasidad de un fakto es de primera importansa... ma para syertos de entre mozotros, konsernando la Biblia, dokumento revelado  o eskrito por el ombre, lo ke es esensyal es la valor etika del mensaje transmetido, el kual  konstitue la baza mizma de la sivilizasyon...
Puede ser ke nunka se puedra saver el verdadero orijen de Moshe Rabenu engrandesido en el  palasyo del Faraon ni de Yosef Atzadik governador de Ayifto,  lo importante es ke a una epoka  ande mansevos i ninyos eran sakrifikados sovre altares inkonados para onorar divinidades materyales, un lejislador ebreo pudo en el dezyerto inkulkar a un punyado de ombres ainda emprenyados de los rituales idolatres, “un kodigo sosyo-relijyozo” bazado sovre los deveres i los derechos del ser umano i de averles avlado de un Dyo abstrakto, intanjivle, ke no se puede ni ver ni tokar, el mizmo sotometido a un ovligo de justisya... Lo  importante sovre todo es ke este puevlo ebreo oyo i entendyo el mensaje i lo aksepto asta muestros dias.
Segun munchos analistos judyos o non judyos, la relijyon Judia se identifika partikularmente kon la “Moral” i kon una multitud de deveres destinados a reglar sus relasyones kon los otros. Syempre segun estos pensadores, el Judaizmo es la sola relijyon ke no demanda a la persona de “kreer” ma de “azer”, la sola relijyon de la kuala los komandamyentos no son solo “aktos de fey” ma “prinsipyos sovre todo de aksyon”.
De otra parte la semana pasada a interval de unos kuantos dias, el kanal  T.F.J., syempre de la Tekevizyon Franseza  mos dyo la posivilidad de asistir a  debates muy interesante sovre el integrizmo relijyozo i los riskos de odyo i violensa ke el komporta.
Entre los partisipatens: En la primera djunta) Prelados kristyanos i Hahamim de alto grado. En la segunda) Relijyozos Muzulmanos de grande sagasidad i  senso moral, ansi ke syempre Rabinos reputados por sus analizes judisyozas de los tekstos biblikos. En las dos performensyas el Ex Gran Rabino de Fransya René Sirat estava prezente.
A un syerto momento (si no me yerro, en la primera djunta) el Gran Rabino René Sirat  disho una palavra muy sinyifikativa “matar umanos al nombre del Dyo es azer de El un Dyo ateisto”...
El eskopo de estas reunyones de eminentes reprezentantes de las tres relijyones monoteistas, es de ensenyar en la sinseridad de sus kreensas, los verdaderos prinsipyos de la ley  ke son esensyalmente bazados sovre el respekto i la solidaridad umana.