Auguste Rodin el kreator de ovras “Le Baiser”, “Balsac”, “Le Penseur” etc... ke son skulptras de kortar el reflo de las mas chikas, a las mas impozantes, izo konoser este arte i “enkantar” el mundo kon su epopea fantastika!...
No solo kon su arte, ma kon su filozofia, sus amores, Rodin predomina muestro siglo.
El skulptor supo transformar el arte del siglo 19 (el Romantismo) i propozar un “muevo reflo” de modernita al siglo 20.
“Sabancı Üniversitesi Sakıp Sabancı Müzesi” en Estambol mos prezenta esta vez, la rika koleksion de las ovras del artisto emprestada del “Muzeo Rodin” en Paris.
Kon su vista eksepsional del Bosforo i de la mar Marmara, el muzeo mos ofre sus desenes maraviyozos, sus fotografias i su propria koleksion, 100 skulpturas 203 pedasos de admirar!...
Vos konsejo de no mankar de vijitar esta ekspozision unika.
