Antes unas kuantas semanas, en mi artikolo sovre el tyempo i vakansas, dishe ke no tengo dingun problema kon el tyempo. Tambyen, i dingun plano de vakansas. Egzakto...Entremyentes, arrekayento de muevo, i en akeyos diyas, arresivi unos, dos telefones de konosimyentos ke tenemos en Silivri. Estavan asperandomos... El tyempo ermozo, mos dechidimos de partir por unos kuantos diyas. En fin de kuento, es bastante serka , un traje de ora i medya, maksimum. Lo ke mos da la posivilidad de pueder tornar el momento ke keremos, en ovligo...
Puede ser ke no es muy elegante de mi parte, ma, devo prechizar ke mos fuimos a un otel. Es un poko afuera del sentro, un lugar de kampanya, i, djusto ensima la mar. En realidad, ay kaji 14ᆣ anyos ke mos vamos ayi. Mos arresiven, no komo klientes, ma, komo vyejos amigos (vyejos i tambyen aedados!!). Para pueder mijor entenderla, i por el menester de la konseja, di esta chika informasyon. La konseja esta paresyendo un poko i a una anekdota.
Bueno!!...Komo lo dishe, lo mas del personel ya mos konose. Tanto, ke no mos demandan ni karta de dezayuno, ni el no. de kamareta. İ, entre eyos, M..., uno de los shefes del restorante... Solamente, este buen mansevo, lavora entre el diya, de sorte ke no tuvo (me parese) la okazyon de renkontrarmos la noche. En kada demanyana, desde anyos, mos vemos en el dezayuno i mos avlamos bueno. Ansi fue i esta vez...
Si no me yerro, era el treser o kuatren diya, oras de tadre. No topando kualo azer, pensimos de abashar a la sivdad. Mos plaze dar un torno en el charshi, i en el “Kordon Boyu” (el bodre de mar). Djusto delantre del otel, tomimos el minibus (dolmush) i en dyez puntos, ya estavamos en la sivdad. Ay ermozos kafés, ma, no kijimos asentar, preferando kaminar un poko.
A un momento, vide venir de enfrente, un kupl mansevo, kon una kriatura. El ombre estava kara konosida, ma, no pude realizar de vista ken era...Sin su uniforma, era difisil de konoser a M...Enfin, mos saludo, en prezentando su espoza. Koza kuryoza, yo lo remarki komo un pokitiko entravado (çekingen). İ, mizmo, tuve la impresyon ke M...estava enkantado, komo sospechozo (kuşkulu), no hatishinas komo de uzo.
Al diya, en el dezayuno, lo vimos. Ma, su arresivo no komo syempre, estava un poko yelado, leshano...La verdad no di muncha importansa, supozando ke podriya tener algun problema personal. Dingun dar i aver kon mozotros... Ma, poko despues me rendi kuento ke me estava enteramente yerrando!! Komo se dize en Turko,” bal gibi!”, el problema eramos yo i mi marido!..Lo entendimos kuando vimos venir M..akompanyado de una de las direktrisas del otel. Apenas se aserkaron, oyi M..dezir:” İşte bu beyler, S..Hanım!”.
Keridos lektores, no vos puedesh imajinar las tarakas ke echo S..! Tanto, ke todos los ke estavan dezayunando, mos kedaron mirando kon kuryozita. Savesh kualo fue?...M...ke uzava a vermos las manyanas durante anyos, i anyos, asigun ya lo ekspliki, no mos aziya kontrol. Porke era siguro ke eramos klientes del otel (komo de fakto). Ma, kuando mos vido en la sivdad, del para el, arrivo a la konkluzyon ke eramos moradores de Silivri. Par konsekuensa, penso ke estavamos entrando de vez en kuando, “kaçak”, i dezayunando debaldes!...
Todo en no topando derecho su komporto kontra mozotros, de un punto de vista le dimos razon. Primeros anyos ke empesimos a ir al otel, no aviya sistema de kontrol las demanyanas. İ, muncha djente, savyendolo, profitavan de esta mankura, espesyalmente en las fin de semana. Los remarki yo muy frekuente, ma no avli. Veniyan para pasar el diya a la pisina o a la mar (ayi uvo syempre un kontrol apretado). Komo jeneralmente eran kon short i tee-shirtes, se les aziya mas fasil de entrar al restorante. Kon un grande “pishkinlik!”, komo ke si no aviya nada, kon un ayre muy natural, entravan i dezayunavan!.A la fin, el personel se esperto, i dyeron fin a este abuzo.
Tornaremos a muestra konseja i a M...El povereto, chapeteado de la verguensa, no saviya kualo azer. Porke la Sra S.., kalmandose de reir, le aviya dicho, entervalo, ke eramos los mas fideles klientes desde anyos, i amigos de todos. Sovre esto, yo, keryendo meter fin a la tortura del mansevo, dishe:” Para mi, M...izo su dover. Afilu lo devesh felisitar por su bivez. De dinguna manera, no tenemos keshida.”
Naturalmente, M...mos demando de pardonarlo. No se kontento de demandar pardon, i, por akeya noche, mos envito a komer peshkado en el restorante de su ermano, en la sivdad. La verdad ke no kijimos meterlo en gaste (poko o muncho). De otra parte, refuzar iva ser blesarlo, i azerle pensar ke estavamos arravyados. A la fin topimos una solusyon i kedimos d’akordo sovre irmos despues de komer.Mos sirvyeron frutas i kafe. Pasimos unas, dos oras enteresantes kon estos mansevos, i kon muzika. Ya endivinariyash ke el sujeto prinsipal de la nochada fue la konseja ke vos konti. M.., insistyo de yevarmos kon su chiko oto fin al otel. İ, ansi mos espartimos buen amigos...
