Por eshemplo: A tala o tala epoka los akontesimyentos markantes de la vida judia en diferentes payizes i mizmo en diferentes sivdades, el konteksto sosyal en el kual bivyeron muestros antepasados, segun el lugar ande se topavan, prinsipalmente en la Peninsula Iberika ma tambyen en Fransya, Austria, Gran Bretanya, Polonya, Italya, el Emperyo Otomano, los Balkanes, el Oriente Medyo i mas tadre la Amerika del Sud... las diferensyas i las similitudes de kondisyones ande se pasavan los evenementos ansi ke sus razones vizivles i invizivles.
El mos da tambyen una idea sovre el nivel i las variasyones del antisemitizmo a varias epokas, en diferentes puntos del mundo, ansi ke las kavzas verdaderas relijyozas o simplemente politikas, las reperkusyones de kada kavzo sovre los otros, i la multitud de motivos, reaksyones i interesos ekonomikos ke azen la tekstura sosyal de un siglo.
El livro empesa komo se entyende byen kon la Peninsula Iberika. El otor mos dize ke segun syertas leyendas non konfirmadas, los Judyos ya bivian en Espanya desde los tyempos Biblikos.
Es posivle kel establesimyento de un grupo de Ebreos debasho el Emperyo Romano permetyo la kreasyon de una chika komunita Judiya.
Por dar una chika idea de lo ke se topa en esta ovra, me permeto de sitar dos o tres chikos egzempyos:
Meldamos, ke desde el prinsipyo del kuatren siglo, en el famozo Konsilyo Ekumeniko de Elvira, unos de los primeros kanones i reglas de diskriminasyon kontra los judyos fueron votados: “Interdiksyon de unyon entre Kristyanas i Judyos”, “prohibisyon de resivir kualkyer Kristyano a sus meza o de bendizir los kampos apartenyendo a Kristyanos”.
En la mizma epoka ke kuvre unos kuantos siglos, ke se pasa en los otros payizes de la Evropa?
“En la Almanya”: Los primeros judyos ke ayegaron a este payis fueron merkaderes ke ivan a la sigida de las lejyones Romanas. Eyos fueron byen resividos. Segun la komunikasyon de un savyo judyo del dojen siglo, una letra datada de 960 fue mandada a “Eretz Israel” por Judyos de Almanya, demandando la konfirmasyon de rumores konsernando la venida del Mashiah.
“En Fransya”: Epoka Romana- Merovenjyana: En el anyo 465, la fraksyon de populasyon ke adopto el Katolisizmo pujo despues la konversyon de “Clovis” i un siglo mas tadre en 574, las primeras tentativas de konversyon impozadas a muestros leshanos ansestros se izyeron sentir.
La situasyon no ayego nunka a un punto trajiko, las relasyones entre los otoktones i los Judyos eran relativamente amigavles, i en 820 la venida al poder de la Dinastia Karolenjyana fue reelmente favoravle para muestros antepasados...
“En İtalya”: La situasyon de los Judyos era leshos de ser briyante, los notavles Kristyanos pushavan avyertamente el puevlo a kemar las sinagogas..
Kon el mizmo esprito metodiko, muestro amigo kontinua a darmos el rezultado de su bushkida,arrestandose sovre syertos puntos, komo la ekspulsyon de los Judyos de Espanya, el kayente arresivo sovre las tyerras Otomanas, la situasyon en la periferia Kristyana ets...
Ansi, Baruh Pinto otor de dos presedentes livros entitolados “ Sepharadic Onomasticon” i “What’s behind a name” mos ofrese un ermozo instrumento de investigasyon a differentes niveles, sovre la istorya de la diaspora Judia, un enorme lavoro de investigasyon en mizmo tyempo global i komparativo a travers el Tyempo i el Espasyo.
Le sueto de alma i korason salud buena afin ke, kon su metikulozidad proverbyal, el kontinue a darmos un semejante lavoro konsernando la epoka aktual...
P. S. Este livro esta en vendida en el
Gözlem Gazetecilik Basın ve Yayın AŞ.
www.gozlemkitap.com
kitabevi@salom.com.tr
