Coya DELEVİ
Oy, dechidi de no eskrivir un artikolo muy seryozo. El lektor ya va ser bastante emosyonado de meldar
el dosye miyo de “EL AMANESER”, ande esto relatando una trajediya ke bivimos antes 30 anyos...
Bueno...en estos diyas, estamos vyendo en las vitrinas de todos (o kaji) los magazenes, una furya de “soldos”. Portanto estavamos dayinda en medyo del enverano kuando aviyan empesado...Antes, saviyamos, solamente doz vezes al anyo, se aziyan soldos. I, djustamente, sus nombres eran en Turko :”Mevsim sonu indirimleri.” Lo ke kere dezir, “vendidas a rebasho de fin de sezon.”
Ay unos kuantos anyos, se izo kaji abitual de ver afishes i panos semejantes en el korso de los dodje (12) mezes. Aktualmente, los rebashos alkansaron a 0/0 50, i en desparte de estos soldos inkreivle, ay i diversas reklamas. Seya en los jurnales, seya en la T.V, estamos vyendo ke, a tala karta de kredi estan azyendo 12 taksites, o a otra, 15, i ets..Malgrado esto, los magazenes no estan yenos, komo uzavamos a ver en peryodas de soldos. Por siguro, en menester, no ay duda ke vamos emplear o merkar. Ma, antes si era, esto kavzava una lokura, una freneziya (çılgınlık) de merkar, de gastar...
Estas vendidas kon taksit, me izo akodrar un sistema muy frekuente en mi chikez i mansevez. No se si en el vokabularyo Ladino egziste el byervo “semanadero”. Lo empleavamos muncho, lo tengo sintido vezes, i vezes. İndikava la persona vendyendo kon fiado. En Turko se yama “veresiyeci,” ke puedemos tresladar komo “fiador.” Munchos de estos vendedores eran ambulantes, syertos teniyan sus butikas. En jeneral, vendiyan ropas, blankeriya (çamaşır) ets...Los ambulantes, ivan de kaza, en kaza, seya para vender, o seya para arrekavdar.( tahsilat) Los otros eran mas mazalozos, syendo ke, en sus lugares, teniyan la posivilidad de prezentar mas muncho “çeşit.”En vezes kombinava ke, i algunos de estos butikaryos, ivan a las kazas de los klientes para arrekavdar.
Los yamavan semanaderos o semaneros. Puede ser ke eran los klientes (la majorita mujeres) ke les dyeron este nombre. Porke, era de semana, en semana, ke se pagavan. En esto, diferan de los versamyentos (taksitler) aktual ke se azen mez, por mez. Ya se ke este uzo se pratiko anchamente, i por una lunga peryoda. Puedo dezir ke kamino muy byen, asigun me esto akodrando.
Ser fiador o semanero, era un echo, kaji una profesyon. No esto sigura de aver visto en la kaza de mi madre algun vendedor semejante. Ya se ke el papa miyo (B.M), no le plaziya merkar nada fiado. La maale entera teniyan kuento avyerto en el bakal, o en el karnesero (kasap), mozotros no...Syempre empleavamos kontante (peşin). Era el prensipyo de mi famiya, un uzo ereditaryo!! al pareser, porke, i yo no prefero el fiado..
Kon tyempo, poko, a poko, el sistema de “semanadero” desparesyo. En realidad, es difisil de dar una data determinada. En analizando las razones de esta fin, yo arrivi a una konkluzyon, djusta o no, al lektor de komentar. Desde anyos, el semanero teniya una ancha kliantela de muestra komunita, fidela i fiksa. No se puede enyegar ke la mas grande parte de los klientes emigraron a Israel. Esto es un fakto.
Kon tyempo, ( o, puede ser ya egzistiya de antes ) uvo una sorte de dejenerasyon.(yozlaşmak) Se empeso a ver las “ Bohçacıyas.”Estas mujeres, se echavan el bogo (bohça) al ombro i sirkulavan (dolaşmak) en gritando! “Hanımmm bohçaci geldiii, çarşafçi geldiii!..”En majoritad, vendiyan pedasos de ashugar, savanas, broderiyas ets...
En pensando un poko, se puede remarkar las otras razones, mas teknikas, o komo dezir? mas modernas! ke kavzaron la desperasyon del sistema del “fiador.” La mas importante es la entrada en shena de la karta de kredi. En primero la mirimos kon duda, ma, mos auzimos muy presto a eya. Al lado de ser pratika, la karta de kredi es tambyen sekanoza. Komo lo estamos vyendo, esta pushando a konsomar, a merkar, afuera del limito. Malorozamente, munchos estan gastando mas demaziya de lo ke ganan. I, estamos vyendo muy frekuente, las konsekuensas dezastrozas.
En Turko, ay un reflan (deyim) muy sinyifikativo:“Ayağını yorganına göre uzat.”Lo ke kere dezir:” ”Alarga el pye asigun tu kolcha.” I, komo se esta vyendo, la kolcha, munchas vezes esta muy kurta..Las vendidas a rebasho ke mensyoni en el empesijo, son tambyen otra razon dela falita (iflas) del sistema de fiado. Naturalmente, al lado de esto, i los taksites inkreivles,(si tyenes o no, karta) ...Puedemos alora nombrar esto, el sistema moderno de “veresiye!!,” ke dizish?!!
Keridos amigos, no se ke grado vos entereso lo ke eskrivi oy. Esto admetyendo ke no es un artikolo, komo ke diga? muy entelektual. Alora, i vozotros, devesh admeter ke no es muy fasil, en esta kalor, i kon la dizpozisyon de espirito aktual, ni eskrivir, ni meldar un teksto seryozo. Oy, es un “sohbet” ke izimos entre mozotros, i mos akodrimos de syertos uzos de un pasado relativamente serkano. “ LA MANSEVES SE MANTYENE DE SUENYOS, LA VEJES DE REKUERDOS...”
