Marsel RUSSOBu haftaki sayımızda, Lübnan`ın kısa tarihçesini, Ortadoğu`da yer aldığı rolü inceliyoruz. İsrail - Lübnan Savaşı`nın dinamiklerini anlamak adına, Lübnan`ın ve bölgenin tarihi hakkındaki yazı dizimizi, okurların ilgi ile okuyacaklarına inanıyoruz
David ALTARAS
En la lingua Judeo-Espanyol tenemos la ekspresyon “Nasido de Viernes”. La djente para definir la persona mazaloza emplea esta lokusyon. Ansi fue de mi. Mierkoles pasado el 16.05.2006 estava prezente en el konserto dirijido por Daniel Barenboim.
Kuando entri en la sala, la vide kompletamente yena i muncha djente en pies. Orozamente asentado en la sigunda fila, tuve la oportunidad i el plazer de oyir mijor la melodia i de observar las mimikas de los muzisyenes, sus ardor i entuzyasmo ansi kel animo ke eyos metian asta obtener una fonetika febril ke se enfiltrava en los korasones de los oyentes.
Remarki ke los mansevos ke kompozan este orkestra son reelmente muzisyenes de grande talente, tanyendo kada uno su instrumento en perfekta sinkronizasyon kon el Maestro. Ademas, estuve impresyonado de ver sus konsentrasyon, komo si bivian el tema i la filozofia de la partisyon, kudyozos de transmeter sus sentimientos a la asistensia. A ver mizmo la mansevika ke aboltava las pajinas de la partisyon del pianisto se sentia a ke grado eya estava transportada por la melodia.
Se dize ke depues de un konserto ke Daniel Barenboim avia dado a la edad de 11 anyos, el famozo maestro Furtwaengler lo avia nominado “fenomeno”. Tenia razon. Se kere una vizyon umanista i altruista muy grande ansi ke un korason yeno de amor, para pensar arrekojer un orkestra de mansevos de diferentes paizes, ademas paizes enemigos entre eyos
No me syento kapache de definir egzaktamente la personalidad del Maestro Barenboim, esto me sovrepasa. La sola koza ke puedo azer es de enklinarme delantre una semejante persona.
Tal son mis impresyones de este konserto. Yo no so ni un muzikologo ni un kritiko de arte ma solo un melomano komo todos los melomanos i una vez mas estuve konvensido ke la muzika es universal.
En realidad no so nasido de viernes, ma me siento mazalozo de aver estado prezente a este pranso tan riko del Arte. I antes de terminar, me ago el plazer de agradeser El Dio Baruhu ansi ke las personas de grande korason ke pensaron invitar el Maestro Barenboim i su orkestra. Toda mi gratitud tambyen a la persona ke me invito
Samuel Johnson (1709) tyene dicho ke “La muzika es el uniko plazer sensual sin pekado”.
