Coya DELEVİOy no vo eskrivir muy largo, no esto en umor de esto, en kurto, no tengo gana de azer moabet komo lo uzo syempre. Puede ser por primera vez, esto realizando “KOMPLETAMENTE”, ke se esta serrando una oja de mis rekuerdos, de mi chikez, por no avrirse mas, entonses. Anoche me ambezi la muerte del Sr. Marko Kastoryano, granpapa de muestra kerida Gila Erbeş. Me embaraso muncho de no aver sido informada a tyempo. Me embaraso de no pueder azer onor a un amigo ansyano de mis paryentes...
En syertos de mis rekuerdos lo nombri, konti ke eramos vezinos kuando moravamos en el Kal de Los Frankos. Era fin de los anyos 1930 i empesijo de los 40... Ma, en el korso de los anyos, nunka mos pyedrimos de vista. Seya enverano, los anyos ke me iva a Burgaz, o seya ke tuvo relasyones de negosyo kon mi marido...
Dayinda, antes poko tyempo, Gila Erbeş, en el “Şalom”, le avyo el telefon, dizyendole:”Alo Marküs,” este modo lo interpelava Gila a su Nono. “Alo Marküs, mira ken esta aki ke te kere avlar...” I, fue ansi ke tuve la okazyon, antes unos kuantos diyas, de avlar kon el Sr. Kastoryano. Se akodro muy byen de mi, de mi famiya, de mi marido. Le demandi afilu, fiandome a su memorya klara, syertas presizyones sovre diversas datas i faktos ke me aviyan deshado en dubyo. I, el me dyo las repuestas ke keriya sintir yo.
Para mi es mas de la pyedrita de un vyejo amigo... Para mi, es la serradura de otruna puerta de mi pasado, por no avrirse mas. Es la pyedrita de un kerido testigo de mi chikez... Estamos mandando aki, todas muestras kondoleensas a la famiya atristada, esperando de tener la okazyon de azer una onor personal.
