Klara PERAHYA
La semana pasada mi amiga i kolega Güler Orgun me mando el teksto de las palavras ke David Grossman (grande eskritor Israelyano, myembro de la asosyasyon “Shalom Ahshav”) pronunsyo delantre la tomba de su ijo kaido en el kampo de batalya de la ultima gerra Israelo-Libaneza.
Vos transmeteremos la traduksyon del teksto en judeo Espanyol echa por el sinyor “Avram Mizrahi Modiin Israel”, en la rubrika El Ponte del proksimo “El Amaneser”.
No pude detenerme de resentir una profunda emosyon en meldando estas palavras de un padre delantre la tomba de su ijo, komo si el dialogo entre eyos kontinuava syempre, un eternal dialogo al pareser de una sola boz ma ande se syente en kada byervo la prezensya del otro...
Niguna revolta kontra el destino en los byervos ke David Grossman pronunsyo, el ke lucho toda su vida por un ideal de paz i ke paradoksalmente pyedro su propyo ijo en defendyendo su patria kontra el enemigo... Ni ira, ni sanya,solo una immensa dolor ekspresada kon muncha novlesa.
Dos dias despues ke resivi el dicho teksto, tuve la okazyon de enkontrar muestro amigo Viktor Üçer aktual prezidente de la Matan Baseter/Barın Yurt, ke avia tambyen pedrido su ijo en el orrivle asalto terroristo kontra las sinagogas de Neve Şalom i de Şişli, alora kel mansevo estava kumpliendo kon koraje su dever voluntaryamente asumido de guardyan de la sekuridad.
Dos kavzos kaji similares. En los dos ombres, la mizma dinyita delantre la dolor... En eyos, el mezmo sentimyento de orgolyo delantre la bravura de sus ijos, i aktualmente el mizmo esforso de no deshar despareser la memorya de los ke fizikamente desparesyeron por syempre.
En los dos tambyen, una mizma vizyon de lo ke es la muerte, konsiderada no komo akavamyento de la egzistensya, ma en raporto kon todo el potensyal de vida ke una persona puede deshar detras de eya.
Es una realidad ke (en syertos kavzos) la muerte sovrepasa su estado de “Non-Ser”, para devenir paradoksalmente una huente de enerjia ke avre la puerta a muevos pasos en el avenir, grasyas djustamente a paryentes kudyozos ke perpetuan la memorya de los defundos kon aktos de umanismo dedikados a sus nombre..
Dos padres muy amargos ma tambyen muy korajozos ke mos embezan kel ombre (kual ke sea) no egziste solo en si mizmo, ma tambyen en todo lo ke da o byen desha de el mizmo...
