Ay de esto 20 anyos

Tengo ainda en las orejas las palavras de una vyeja mujer ke mos avia dicho kon muncha kandor...”Ya avia aparejado el dezayuno de shabat, avia todo bueno sovre la meza: dulses, biskochos, borrekas i tambyen una ridomika de raki..le gustava muncho un sorvo de raki kon kozas de orno...Kuando la puerta sono, pensi ke era el ...ma era un sinyor kon la kara seryoza...no entendi immedyatamente lo ke me disho, no kije, no pude entender...”
En la mirada de la vyeja mujer avia la trajedia entera del puevlo judyo arrondjado i molestado sin kulpa ni razon i aktualmente el drama de la umanidad  sotometida al kapricho loko de un punyado de ombres  ke no saven ver la verdadera valor de lo ke es un “ser umano”.
Devo de adjustar kon orgolyo ke el dia de la desgrasya, el buro de la komunidad Neve ªalom estava yeno de mansevos ke koryeron espontaneamente ken de las Islas ken del Bosforo, prontos a ayudar i a dar sangre a los feridos.
Ke  todos los ke pyedreron la vida en esta terrivle trajedia repozen syempre en paz.