K.P.Ay de esto 20 anyos, una demanyana de shabat ,a la ora de la tefila, la komunidad Judia de Estambol konosyo reelmente, por la primera vez, la orror del terrorizmo moderno, syego, sin facha ni identidad presiza...Akto loko, ineksplikavle, inimajinavle.
Ester YANNİER
Es kon muncha plazer ke esto eskrivyendo esta eskrita. Al sujeto de mis keridas amigas de Burgaz; İda, Roza, Esterina, Çela i munchas mas ke no se sus nombres…
En los mezes de enverono mos vamos a la izla Burgaz. Aya tengo amigas de diferentes edades. Mas grandes u mucho mas chikas de mi. No es muy emportante los anyos, para demandar “komo estas?”, u para saludar una persona. Me gusta de avlar en Judeo- Espanyol kon mis amigas (ke son “unos kuantos anyos” mas grandes de mi) … Kreyo ke i a eyas tambien les plaze de avlar kon mi. Por ke una diya eyas estavan asentandas en el lugar ande siempre se asentan, de basho del arvole, no las vide i passi, pishin me yamaron en dizyendo : “no mos vas a saludar?…”
Las “ijikas” de Burgaz, siempre se asentan debasho del arvole, i les demando “komo estaj ijikas?” es de ver komo riyen a esta demanda… No es solo “saludar” i pasar, en vezez es kon muncho plazer me asento i avlo kon eyas… Me dizen siempre ke ay muncho bruido, i komo ke no ayga bruido? Para guadarser del sol, estan asentandas serka ande se juga tavli… Se estan olvidando ke, los ombres ke jugan tavli gritan …
İ eyas siempre me demandan “ no mos vas a kitar al Şalom”, esra semana es el tiempo. Komo avlamos kon eyas en Judeo-Espanyol, el lugar de esta eskrita deviya de topar lugar en esta pajina…
Munchos otros ke estan oyendo ke estamos avlando, en esta lingua, i eyos ampesaron avlar kon mi en Judeo-Espanyol…
Para mi es un plazer de avlar en esta lingua ke oyi de mi grandmama. Solamente, de ke no se, me estan diyzendo ke esto avlando komo los Karaim?
