K.P.Ay de esto 20 anyos, una demanyana de shabat ,a la ora de la tefila, la komunidad Judia de Estambol konosyo reelmente, por la primera vez, la orror del terrorizmo moderno, syego, sin facha ni identidad presiza...Akto loko, ineksplikavle, inimajinavle.
ESTOS CHIKOS PROBLEMAS DE LA VEJEZ
Coya DELEVİ
Ay solamente doz, tres anyos ke me ambezi la selebrasyon del diya de los avuelos. Se fyesta desde munchos anyos en los Estados Unidos. No tyene una data fiksa. En Septembre, el primer Alhad despues del “Labor Day” (işçi bayramı) de los Amerikanos, es el Diya de los Avuelos. Por darvos una presizyon!, adjustare ke oganyo el “Labor Day” kaye en el 4 Septembre. Malgrado lo ke desha prezumir el byervo “avuelo”, todos no son aedados. Ay entre los grandes paryentes, nonas i nonos muy mansevos. Ma, yo, oy no va tratar de eyos, vo azer moabet kon los amigos de mi jenerasyon.
El famozo poeta Turko, Cahit Sıtkı Tarancı disho en uno de sus poemas: “Trenta i sinko anyos, la mitad del kamino...” En muestros diyas, puedemos trokar un poko i, sin muncho egzajerar, dezir:” Sinkuenta anyos, la mitad de la vida...” Por siguro ke mos estamos envejesyendo, esto es en la natura de las kozas. Ma, envejeser, entrar en anyos, no kijo dezir solamente problemas, i, espesyalmente problemas de salud... Aktualmente tenemos la posivilidad de gerrear, de venser, o, a lo menos, de atrazarlos en grande partida. Kon pasensya, kon esperansa, kon un poko de esforso i sin dar muncho enfasyo a los ijos, a los inyetos...
Antes de todo, mirad de minimizar la importansa de vuestros chikos dezrepozos o problemas. En vezes, no inchen ni la kashkara de una avyana!!, komo lo dize un reflan Turko.. Kualo?!..Los kaveyos empesaron a kayer, o a emblankesersen (yo teniya 20 anyos kuando me vide kon kaveyos blankos!). D’akordo, esto admetyendo ke el “tepe!” de la kavesa ke se esta vazyando, no es muy estetiko, i yo tengo este problema. Kaveyos blankos? No es una katastrofa (felaket). Si keresh, i ya lo savesh muy byen, el kuafor va topar remedyo.
Salitesh a dar un torno a pye, a kaminar, i vos estash keshando de kansarvos presto. Alora, no kaminesh una distansya muy larga. İ, no vos pareska ke los menos aedados de mozotros no se estan kansando en vezes...
Unos amigos estan keshozos de no durmir bastante, o mas egzaktamente, de “aferrar” difisilmente el esfuenyo. Bueno, esto es kaji lo mizmo, en las personas de una syerta edad. Yo, en esta situasyon, no me haraganeyo, me alevanto de la kama. Meto una kaseta, un disko de muzika klasika, o, miro en la T.V,si ay un progam ke no me va deranjar. Despues, bevo una kupa de leche i me vo de muevo a echar...El uniko inkonvenyente (mahzur) es, ke a la demanyana, me alevanto un poko mas tadre ke de uzo. Lo ke miro de NO AZER, es tomar un somnifero.(uyku ilacı). Si empesi a esto, oy vavoy!..no ay fin..Tambyen, vos estash estrecheando de olvidar syertas kozas. No lo agash ansya grande. En kavzo ke no es el estado de una hazinura seryoza komo el “Alzheimer,” o otra, chikos olvidos son problemas de munchos.
Si ay algunos mansevos entre mis lektores, ke me permetan de darles un konsejo. Agora ke tenesh anyos delantre de vozotros, tenesh tambyen, la shans i la posivilidad de tomar prekosyones (önlem) i, ganar uzansas saludozas, komo: una buena i ekilibrada alimentasyon (dengeli beslenme), prove de kolesterol. No neglijar despues de una syerta edad, vuestros kontrolos medikal, no konsomar muncho alkol, i estar absolutamente leshos de fumar. En desparte, puedesh azer, en la mezura de vuestra posivilidad, egzersisyos de jimnastika de meoyo, komo, puzzle, rompekavesa,(bulmaca), meldar, ets...Dando estos konsejos, me esto sintyendo komo una profesora!, dotrinando(eğitmek) sus elevos...Naturalmente, no tengo esta entisyon. Yo, personalmente, ay anyos ke pratiko esto todo, i syempre tomi buenos rezultados.
Tornaremos a los chikos problemas de mi jenerasyon...Karos amigos, no kije azer un artikolo muy seryozo, komo dezir? muy profesyonal. Esto es un moabet entre mozotros, komo los ke me plaze azer kon mis keridos lektores. Ma, siguro, ke ay una buena doza de relidad en mis propozitos i konsejos. Son tambyen, la pura ekspresyon de mi optimismo. I, otruna relidad!, los sohbetes los mas dulses, son los mas kurtos. I, al pareser, ke ya eskrivi, pardon! “avli” bastante!!...
SYENTEME!..
Unas, doz rugas debasho los ojos,
No es la fin del mundo!
Un pelo blanko en los kaveyos,
Mira kualo estas reselando!!...
No agas ansya los diyas ke pasan,
Kreeme esto no tyene importansa,
Son buenos los anyos ke se van,
Mas i mas si deshan esperansa.
Si, ermozuras a tu vida adjustaron,
Si, te dyeron amor, i kerensyas,
Si, dulses rekuerdos te desharon,
Los anyos ke pasen, i los diyas...
Del tyempo ke pasa no t’espantes,
Bive tu vida, bivela, i syenteme!,
El muevo diya, es mijor del d’antes,
La vida es ermoza kuando la bives.
Coya Delevi
