Klara PERAHYA
Si.... un fakto diverso entre mil otros , ma sinyifikativo, sorprendente en su desvelopamyento, una trajedia umana
A la sigida de la novela publikada en kaji todas las gazetas konsernando la evazyon de una mansevika austriaka arrevatada antes 10 anyos i sekuestrada por un prezumido psikopato , una kestyon se enfinko en mi meoyo, asta persigirme de una mala manera: Ke semos reelmente? no solo en el konteksto sosyal ma en la realidad deznuda de muestro “ser” ?
Asta ke grado los akontesimyentos (independyentes de muestra personalidad inisyal) tuvyeron una kualkyer influensa sovre su desvelopamyento ulteryor? I sovre todo : De kualo son reelmente echos los raportos entre las personas?
En el kavzo ke mos okupa ,. se trata probavlemente de un psikopato ..ma no importa,.penso ke un hazino mental no es una kriansa totalmente diferente del ombre normal, el es kaji el mizmo, ma sin el freno ke mos permete de dominar muestro ego instinktivo ..syempre los mizmos refleksos, los mizmos menesteres fizikos i sentimentales, las mizmas iluzyones, los mizmos dezeos sin la posivilidad de metrizarlos.
Una ijika de 8 o 9 anyos arrevatada ay de esto 10 anyos i enserrada en un espasyo de unos kuantos metros kuadrados... Es ke su ravisor abuzo seksualmente de eya? Asta unos kuantos dias antes nada avia sido provado ...En todo kavzo, el no la desho murir de ambre, a primera vista no la molesto fizikamente ... A nigun momento no la arranko totalmente del mundo eksteryor, al kontraryo le dyo livros i revistas a meldar i le permetyo de sigir los akontesimyentos aktuales en la televizyon.
Unas kuantas oras despues de la fuyida de la mansevika , el se echo debasho de un treno.... Eske se suisido por amor por su viktima?... o puedeser por pudor u espanto de enfrontar la mirada de los otros? las dos reaksyones son posivles i umanas
De otra parte, al anunsyo de esta novela, la viktima se metyo a yorar provando ansi un syerto grado de amistad por su agresor. Los psikyatres pensan ke se trata del “sindromo de Stockholm”, fenomeno psishiko ke se karakteriza justamente por una relasyon de kaji simpatia entre la viktima i su opresor, posivle a la kondisyon de nos ser molestada fizikamente , lo ke mos permete de prezumir kel ravisor tuvo durante estos dyez anyos una kondukta relativamente korekta enverso la ijika i una absensya absoluta de agresividad ..
En este kavzo, ke pudo ser la verdadera razon ke lo pusho a arrevatarla? un momento de inkonsensya ? puede ser la soledad? una sed intarisavle de kerensya? el menester de tener una persona a ken avlar, kuala ke sea su edad, por la kuala perkurar?
Desde la fin del venten siglo, se ve de mas en mas, mansevos ke no se pudyeron adaptar al ritmo de vida de la epoka aktual ni a esta kompetisyon perpetual ke devino la egzistensya. Perturbados psishikamente aunke intelektualmente normales i mizmo superyores, eyos refuzan las valores de muestra epoka i kortan ansi el ilo ke los ata kon la realidad para enfoharsen sovre un punto fikso, en syertos kavzos, espiritual o umanisto...
Enserrados en un mundo ke mos puede pareser iluzaryo ma ande puede ser bushkan la paz i el repozo, es ke eyos son rekuperavles a muestra manera de ser? Es ke eyos puedran topar la serenidad en muestro universo despedasado por el odyo i la sola voluntad de dominasyon?
