LA VENTANA DE VUESTRA ERMANA Şeli GAON
El tyempo ya empeso a yelar, el enverano kaji ya se termino, las eskolas empesaron a la mueva anyada de estudyos, los mansevos van a empesar fina dyes dias a las universitas...
Ke todos tengan reuşitas en los estudyos i en la vida...
Esto es el mesajero de la tristeza del empisijo del otonyo.
Aser ke, kuando vyene la primavera; la natura empesa a envedreserse, el sol kayenta, las flores enfloresen, los dias se alargan, kon los tyempos kayentes ke empesa las vakansas, mos vamos a las islas kon un umor alegre.
La manera de mirar a la vida de las personas en enverano es diferente del invyerno.
Todos no aman la vida en la isla.
La isla es un pedaso de tyerra ke ez entornada de la mar de las kuatro partes. Ay personas ke se syenten asoladas, enserradas i aleşadas de la vida de la sivdad. Se puede dizir ke la isla es un egzilo volontaryo para muncha cente.
Ma mozotros; los namorados de las islas, vamos i vinimos kon los vaporikos.
Para mi i mi marido es un paradiso ke egziste en una ora de distansya de la sivdad.
La isla es mas valutosa de una coya para los namorados.
Kada demanyana ago una promenad fina Kalpazankaya kon doz amigas muy keridas.
Es una kaminada ke sureya una ora, i a la torna entramos a la mar muy temprano.
A la fin de la semana alkilamos kon unos kuantos amigos una barka (tekne) bastante grande, para entrar a la mar en Neandros, Sivriada i otros lugares.
La mar limpya tyene savor, ver los peşkados nadando, los arvoles enklinandosen fina el bodre de la mar.
La kolor de la mar es blu, vedre, fonse u klaro. Komo de maraviya del Dyo de ver tanto tonalidad de la kolor blu...
Alhad demanyana mos topamos 12ᆢ amigos para salir kon la barka. Todos se okupan kon una koza, unos emplean lo ke se va komer a midi, otros merkan las bevyentas, otros la fruta i kuando ya se eskapo todo; mos suvimos para debarkar a la 12 de midi.
Komo somos bastante muçedumbre (kalabalık), kada uno kita una boz diferente.
Ay cente ke tadra 15 puntos, los otros se inyervan.
Otros ke keren trayer a sus ijos, kale asperar el vapor ke va vinir de la sivdad.
Los ke son muy puntual (dakik) no keren peryer ni un minuto del sol i de la mar.
Todos tyenen manyikas i dezeos diferentes.
Para pueder kontinuar a estar encuntos i azer amigable; kale tener i saver dar la kerensya emprimero.
La kerensya es un sentimyento ke pasa de unos a los otros.
La amistad es mas muncho dar, ke de tomar, i de no ser egoisto.
La persona ke kere bien, es franka, sin mintira, afektuosa, i enduljente (tolerans) al den frente.
La amistad; es la verdad, la ermozura, la komprehansyon i la armoniya.
La toleransya es un sentimyento ke trankiliza al denfrente.
Kon estos sentimyentos de amigable pasamos unos dias alegres; en meldando, avlando entre mozotros, komyendo, entrando a la mar, bevyendo kafe, repozando i cugando Scrabble.
Es un privilejio de bivir en la isla; en este aver limpyo, sin bruido i leşoz de los problemes de la sivdad.
Un tyempo aviya en Burgaz aznos ke transportavan pezgos i aparte las personas se suviyan para azer el torno de la isla.
Burgaz es una isla de vendedor de pişkados. Se puede dizir ke es un kazal de balukçis. En la eskala se ve los kafes uno allado del otro enfrente la mar yena de barkas i motores.
Se ve munchos; perros, gatos, gayos, gaynas, kavayos, paşaros, ormigas, gartejas i otros beemas (hayvan) ke todos son el simbolo de esta isla çikitika.
Todo la cente se konosen uno kon los otros i se saludan unas kuantas vezes en el dia kuando se renkontran.
Ya somos un puevlo muy aunado !.....
La vida es familial; las personas, el bakal, el frutero, los bazarcis, el kasap,el vendedor de agua, el vendedor de cugetes, el farmasyen, el dondurmacı se aderesan (hitap etmek) kon los nombres. Esto da plazer a la persona.
La vida en la isla Burgaz es una kerensya ke no se puede dar a entender; ma kale bivirla yena yena el enverano komo el invyerno; i kale sentirla aryento del korason.
