Sinko anyos de kombates insesantes de parte i otra, durante los kualos el fronte oksidental no supo malorozamente meterse de akordo, ande los partenaryos se pelearon i se despedasaron mutualmente por chikas kestyones de prestijyo personal o de simple orgolyo.... Azer yerros es una koza umana, lo ke es sekanozo es de persistir, de nunka abdikar, nunka renunsyar, nunka trokar de idea.
Munchos grandes analistos dizen ke no kale konfonder el terrorizmo kon los diferentes konfliktos entre governos... en este ultimo kavzo, mizmo en las situasyones ke paresen las mas graves, ay syempre una posivilidad de dialogo i de negosyasyon ...se puede avlar, dar a entender, azer si mizmo el esforso de entender.
En el kavzo del terrorizmo no ay interlokutor... el no tyene kara ni identidad, el es una mentalidad syega kon un solo eskopo:”matar por matar afin de undir el mundo en un jenero de kaos”, “destruir”, “derrokar todo lo ke fue elaborado durante siglos” ...”aneantisar la sivilizasyon”.
Ombres i mujeres, vyejos i mansevos muryeron inutilmente sin distinksyon de edad, ni de kolor de kuero (ya sovrepasimos, a lo manko en aparensya, este terrivle prejuisyo); no importa mizmo el kampo al kual las viktimas apartyenen, todas eran personas kon un mizmo potensyal de amor, de sed de alegria i todas por seguro tenian en el tino un proyekto material o espiritual a realizar...
El tablo no es briyante, el mundo oksidental no tomo ainda enteramente konsensya ke la rikeza, la sensya, el pogreso tekniko o la saviduria syentifika no abastan, solos, para realizar un programa komun ..... otra koza es de menester: “la tenasidad “, “la unyon absoluta en el mizmo kampo”i sovre todo “el sakrifisyo por un syerto tyempo del indevidualizmo”...
Saver salir de las limites del “ego” ke munchas vezes mos enserra entre kuatro murayas; i en el kavzo de konfliktos governementales o personales “azer un esforso de komprensyon enverso el otro”, “achetar ke el kampo adverso egziste tambyen, i ke el tyene su personalidad, sus ideas, sus kreensas i sus razones”, “entender i azer entender al lugar de syempre kombatir”... las armas no rezolvaron nunka kualkyer problema de una manera esensyal, ma solo, en jeneral, establesen una simple situasyon de sometimyento .Eyas son nesesaryas para la defensa, kuando el dialogo aze fayita.
Komo fue dicho mas arriva no kale konfonder “terrorizmo” i “ revendikasyones sosyales o territoryales justifikadas o no”; son kozas enteramente diferentes, ma malorozamente el primer puede tener una syerta influensa sovre el segundo... En este kavzo, es nesesaryo de “dar la palavra a personas del kampo adverso ke ainda son konsyentes de la valor inkomensuravle de la Paz i del entendimyento”, “darles la posivilidad moral i materyal de ser oidos del puevlo anonimo”,”ayudar a azer de estos ombres i mujeres en revolta, personas konsyentes de sus derechos komo de sus deveres, los primeros endjendraran, por seguro (kon el tyempo) los segundos”. Ansi, sino amigos ma a lo manko parteneres potensyales de un mizmo esforso konstruktivo, eyos puedran fraguar en el kalmo lo ke no pudyeron reglar kon las armas.
