Refleksyones de una madre sovre un ermozo evenemento

Klara Perahya

Munchos evenementos a komentar esta semana... ni tyempo, ni lugar i sovre todo ni kompetensya para analizarlos todos... ma uno de entre eyos me parese ser partikularmente sinyifikativo, aunke a primera vista de aparensya menos espektakular.
La semana pasada el 13 del mez de Septembre, tres rabbinos resivyeron la investitura rabbinika en Dresde sivdad Almana
Por la primera vez desde la epoka maldicha del nazizmo ande fue serrado el ultimo sentro de ensenyansa rabbinika, un semejante akontesimyento pudo ser realizado en Almanya. Dos de estos relijyozos kedaran en el payis i el treser ira ofisyar en la Afrika del Sud.
Ya ay largos anyos ke egziste komunidades Judias i sinagogas en la Almanya, ma asta agora ofisyaron solo rabbinos estranjeros embiados de diferentes sentros relijyozos de otros payizes.
Oy en dia, esta sivdad Alemana tyene su propyo sentro de formasyon relijyoza, su posivilidad de formar muevos myembros ke espandiran el Judaizmo en su espiritualidad, lo ke konstitue uno de los mas importantes fundamyentos de su egzistensya...
A ke kategoria de Judaizmo ke apartengamos, el esprito del “Dekalogo”, en su kontenido simultaneamente relijyozo i sosyal, es para mozotros todos el grande punto de unidad del puevlo Judyo.
Kuando Yerushalayim avia kaido en manos enemigas, uno de muestros savyos avia dicho al kapo Romano “deshamos ir i damos la lesensya de avrir una chika eskola en Yavne”. Ansi fue asegurada la kontinuasyon del Judaizmo i se puede dezir su perenidad.
La investitura de estos tres Rabbinos en Almanya, payis ke fue 70 anyos antes, una tyerra de aneantesimyento de muestra relijyon es komo un “Re-empesijo”...
No se trata de un pardon enverso la epoka nazi... el puevlo ke bive oy aya no es el de ayer i no tyene a somportar ninguna responsavilidad... Komo mo lo dize la Biblia: “ni el padre pagara por las mankuras de su ijo ni por seguro el ıjo pagara por las faltas de su padre”.
No se puede nada fraguar sovre el odyo o la rankor... Es por esto ke en estos dias de Yamim Norayim, no es solo a los amigos, a los ermanos de syempre ke me kero adresar para augurarles “Paz”, “Armonia” i “Alegria”, ma tambyen a los enemigos...les kero dezir:” Veni, i mozotros re-empesaremos”
A vozotros ke dizish ser muestros enemigos, a vozotros ke renyegash el pasado de muestro puevlo, a vozotros ke no rekonosesh muestro derecho a la vida, primer presepto de todo modo de relijyon, kero dezir “Sosh inkontestavlemente mas fuerte komo populasyon i komo rikeza... ma i mozotros tenemos la fuersa de muestro pasado... miles de anyos en la servitud ma nunka en la indinyidad... Veni, i fraguaremos enjuntos un mundo muevo, para ke ninguna madre no yore mas”.