Şeli Gaon
Keridos Lektores,
Oy kero avlar d’el estado psikolojiko de la persona en el otonyo (sonbahar).
Ay personas ke se atristan en esta sezon; porke los dias largos, klaros, kayentes d’el enverano, ya estan kaji para terminarsen; el panorama de la natura ke es ekstravagante en enverano, empesa a ariskureserse avagar avagar, komo las ojas de los arvoles ke son vedres, se azen amariyas, las flores multikolores se enklinan verso la tyerra; la kolor de la natura troka enteramente i se aze maron, djusto komo los korasones de siertas personas, siguramente los aedados ke son mas abatidos de pensar el inyerno yelado, ariskuro i asolado.
En el 19’e sieklo los romantikos komo Chateaubriand pensavan i dizian ke davan dos enveranos para un otonyo. Porke es la sezon de kerensya, de amor, esperansa, tristeza i espartisyon.
Aser ke; el otonyo es una sezon de aunamyento de acuntamyento (birleşme), para mi.
Es el tyempo de la unyon, de la solidaridad, de la ahadut de la famiya.
Estamos bivyendo en un tyempo muy moderno, muy diferente de muestra manseves. Los mansevos estan lavorando, viajando i no keren vinir mas a las islas ande estan sus paryentes. Estan bivyendo una vida asolada kon el internet i sus amigos.
La famiya para pueder estar kon eyos, estan trokando sus maneras de vida, i estan konformandosen (uymak) a eyos kon kayades para ke no ayga problemas entre las madres, los padres i los ijos.
En esta forma apartada; el otonyo i el invyerno son las sezones de la unyon de toda la famiya.
En septembre es la fyesta Rosh-Ashana ke para mozotros es el presipyo de anyo (yılbaşı).
Las famiyas pasavan los yamim noraim en las islas.
Ma oy; todos los grandes de las famiyas se estan iyindo allado de sus ijos i inyetos; i las sinagogas de las islas estan kon poka cente.
Rosh-Ashana es el empisijo de un anyo ke esperamos; ke va ser yena dereços buenos, salud, prosperidad, paz, repozo, reuşita, refua i otras kozas buenas para todos entornados de amistad.
En Rosh-Ashana toda la famiya se acunta para fyestar este dia santo; las granmamas, los granpapas, las madres, padres, ijos, ijas, inyetos, kosfuegros; komen, avlan, rien, kontan konsejikas i pasan una nochada maraviyozo.
La kontentes se melda de las karas de los mas çikos fina los mas grandes.
En oktobre vyene Kipur; el dia de demandar pardon al Dyo; de los yerros ke akumplimos durante el anyo, de los korasones ke ofendimos (kalp kırmak) de muestros amigos, de las palavras negras ke dichimos a muestro entorno; esto todo se pardona kon las orasyones, kon las rogamyentos al Dyo.
Antes i despues de la fyesta; la famiya se auna en una kaza; i todos encuntos toman plazer de esta unyon.
Yo penso; ke malgrado ke estamos bivyendo kon muestros keridos ijos, ijas en la mizma kaza komo pansyonaryos; eyos ya tomaron las tradisyones, los uzos de muestra famiya i en el avenir lo van a realizar kon sus famiyas.
Kuando las fyestas se aserkan; ya empesan a demandar; ande va mos a estar; ande mi nono, nona, tio, en muestra kaza?... Esto mostra ke; i eyos estan asperando estos dias santos i muy emportantes para pueder arrekojermos.
Lo ke no keren; es tomar responsibilitas,
Keren bivir kon sus dezeos, lavorar, topar todo pronto en sus kazas, viajar i kaminar kon sus amigas.
No me esto puedyendo kreer ke estos son muestros ijos ke engrandesimos!...
Por siguro, sus maneras de vista es muy diferente de la muestra.
Todo les vyene muy fasil kuando topan todo pronto.
Enfin; las madres, los padres, los ijos i las ijas son muestras koronas.
Anyada buena a todos los keridos lektores, hag sameah i pas i amor en el mundo.
Tizku leşanim rabot...
