Un ombre al momento de la orasyon

Klara PERAHYA

En estos dias de Yamim Norayim, mizmo la persona la manko pratikante no se puede detener de resentir un menester si no syempre de relijyozidad, ma a lo manko de profunda refleksyon sovre la vida i su senso ansi ke sovre su instabilidad i su karakter de finitud... Eya tambyen no se puede detener de azer un retorno verso los vyejos rekordos komo una relasyon invizivle entre el pasado i el futuro.
Ansi este anyo me akodri de un chiko fakto al kual tuve la okazyon de asistir mas de trenta anyos antes. Mi esuegro avia sido niftar. Ombre muy relijyozo i tradisyonalisto, el tenia el uzo de ir demanyana i tadre al kal para partisipar a la primera Tefila komo al Arvid... muncho mas konsernado por los sujetos kultuales i kulturales ke por su propyo komercho, el eskrivia en diversas gazetas de la epoka de una manera / esporadika, debasho la sinyatura YİFRAH...
Mi marido syendo el bohor i solo ijo de la famiya, el dolyo se tuvo en muestra kaza. Durante la semana de syete, resivi un dia un golpe de telefon de la parte de un grupo de yahidim, vyejos kompanyeros de orasyon del difundo, demandando me si puedian venir asistir a la orasyon de la tadre , por seguro acheti immedyatamente ma mi interlokutor kon una ezitasyon en la boz me informo ke entre eyos se topava un ombre ke avia pasado la lepra.
Savyendo (por averlo oido de la boka mizma del kapo mediko de la leprozeria de Bakırköy) ke despues del tratamyento adekuado de la hazinura, la lepra no konserva ningun risko de kontajyon, me presuri de asegurarle ke de mi parte no avia ninguna objeksyon.
Dyes minutos antes del Arvid , los amigos del defundo sonaron a la puerta, kualos mansevos kualos mas o menos aedados... Entre eyos un ombre o por avlar mas klaramente una solombra de ombre, la kavesa abokada... una kara terrivlemente mutilada, profundamente despedasada komo si una mano kruela la aviya arazgada kon salvajeria.
Un momento me imajini lo ke devia ser la sufriensa de este ombre, su sentimyento de umilyasyon delantre la mirada de los otros i sovre todo su revolta kontra la ferosidad del destino...
Kuando unos kuantos minutos despues ke vinyeron la orasyon empeso, me enkoraji a mirarlo demuevo. En su kara avia una ekspresyon ke ningun byervo puedra ekspresar... mas ke la emosyon, era un jenero de serenidad, mizmo de alegria... este ombre kon su kara medya komida por la lepra, kaji sin nariz ni parparos i ke paresia yevar un maske idozo... este ombre en su fervor avia ayegado al punto el mas alto de la kontentez.
En este momente senti reelmente lo ke es el verdadero poder de la orasyon... un kontakto kon una entidad invizivle, silensyoza, la kuala sin palavras de konsolasyon ni de esperansa ma kon la sola fuersa ke inkulka su kreensa, da al ombre el koraje de ir sin kaer ni ezitar sovre el kamino empyedrado de la vida...