El Baron de Rotchild en la Sinagoga de Haydarpasha el dia de Kippur

Dora NİYEGO

Rezultado de una Bushkida
El 28 Elul 5659 (1899) tuvo lugar la seremonia de estrenamiento de la Sinagoga de Haydarpasha kon el nombre ‘Hemdat Israel’. El Ambasador de los Estados Unidos en el Imperio Ottomano, Oscar Strauss asistio a esta seremonia.. El Grande Rabbino Moshe Ha-Levi avyo el Ehal Akodesh. Tres diskorsos fueron prononsiadios; el primer en Turko por el Kolonel Viktor Galimidi; el sigundo en judeo-espanyol por Ribi Avraam Danon i el treser por Ribi Hayim Nahum.
La fiesta de ‘Yom Kippur’ del mezmo anyo fue selebrada en la mueva Sinagoga kon la prezensia del Baron Rotchild ke se topava en Estanbol (Kostantinopla) en viyaje al bodre de su yacht. El Baron ekspreso su dezeyo de asistir a la seremonia de Yom Kippur en la mueva Sinagoga de Haydarpasha. La populasyon de Haydarpasha se ambezo esta nuvela kon grande plazer i tuvo la alegria de resivir el Baron Binyamin de Rotchild (ijo del Baron Edmond de Rotchild) i su primo Rudolf Goldsmidt. Tambien el Ambasador Oscar Strauss, su mujer, su ija i su kunyada asistieron a la seremonia de Yom Kippur.
La demanyana de Yom Kippur, los notavles de la komunidad de Haydarpasha i el prezidente de la Eskolas Alliance Israelite Mr. Fernandez akompanyados de los delegados de la polisia fueron al puerto de Haydarpasha para resivir los invitados i trayerlos a la Sinagoga. Ma malorozamente el Baron Edmond de Rotchild ke aviya tanto dezeyado asistir a la seremonia no pudo akompanyarlos porke se sentia dezrepozado. Solo su ijo i su suvrino asistieron a la seremonia.
Akel dia, la mueva Sinagoga de Haydarpasha fue adornada kon rozas i kon presiozos tapetes. Los envitados fueron resividos kon el himno BARUH ABA BESHEM ABA (Bienvenida) kantado en koro por los partisipantes de la Sinagoga.
Los respektavles envitados se enstalaron en fotolyos espesyales ke fueron rezervados por eyos. Ribi Hayim Nahum, direktor ayudante del Siminario Rabiniko, prononsio un diskorso en lingua fransez ke plazyo muncho a todos los partisipantes. Los administratores de la Sinagoga izeyeron sus dovares en dando la onor de yevar las Sefertoras al mansevo Baron de Rotchild i a su primo Goldsmidt. Mas duspues, los invitados fueron yamados a la lektura de la Torah. El Baron i su primo izyeron grandes donos a las institusiones de Haydarpasha.
El Baron de Rotchild ekspreso su grande kontentes de pasar el dia de Kippur en la Sinagoga de Haydarpasha. El disho ke el edifisio fue konstruido kon muncho gusto i admiro el orden perfekto ke renyo en la Sinagoga malgrado los nombrozos partisipantes. El Baron fue muy estimado i konsiderado kon respekto i simpatia por la populasyon de Haydarpasha.
A sus torno,El Baron de Rotchild i su primo Rudolf Goldsmidt elevados en los mijoewa medios de la sosieta i atados al Djudaizmo, ekspresaron sus rengrasyamientos i manifestaron una grande afabilidad enverso todos los ke tuvieron la onor de aserkarsen de eyos.       
Este evenemento nunka fue olvidado por la populasyon de Haydarpasha i fue guadrado komo un rekodro presiozo.