La peraşa de la semana / Aazinu

Rav Yeuda ADONİ

En los oltimos diyas de Moşe Rabenu, le dize el kriyador a Moşe Rabenu ke yame a Yeoşua, i ke se paren los dos enel Mişkan (Templo) ke kere akavidarlo i rekomendarlo al puevlo delantre Moşe porke se apronte a ser rizidor del puevlo, despues de azer ansi Moşe Rabenu, le enkomendo el kriyador ke eskriva una ŞİRA (Poeziya-Kantiga) i ke se las enbeze a İsrael antes de su muerte, porke le seya de una testimunyansa.
Moşe Rabenu se va a la manyana i rekonta todo esto al puevlo de İsrael dizyendoles ke el ya arivo a la edad de 120 anyos, ke el mas no puede ser ke vaya i venga kon eyos.
En akel diya mismo eskrivyo Moşe Rabenu el livro santo el Sefer Tora del presiyo fin al Kavo. Lo entre go a las leviyim i les enkomendo ke lo metyeran en el Aron Akodeş al lado de las tavlas de la ley. İ meldo delantre todo el puevlo la Şira ke eskrivyo perat-Aazinu i se las dyo a entender byen sigun le enkomendo el todo poderozo.
Esta Şira, es una coya muy valutoza i un trezoro muy estimado en la literatura Cudiya.
El resumido de esta Şira es: Ke Moşe Rabenu tomando por testiguos a las syelas i a la tyera, deklaro al puevlo Cudyo ke, todo tyempo ke eyos avedesen a los komandos de la ley syempre vana tener munço bueno, i prosperaran en todas sus ovras. Al kontraryo, si no afirmaran la ley pueden kayer a un estado muy desagradavle.
En esta Şira, figura Moşe Rabenu todo lo ke tyene ke pasar el puevlo Cudyo disde akel tyempo asta los oltimos diyas. El dize klaramente ke primeros diyas ke vana entrar a la tyera de Kenaan, vana bivir kon pas i alegriya i vana gozar de lo bueno de le tyera. Me despues syendo vana estar artos de munço bueno, vana reveyar i olvidor al dyo ke los truso a esta pozisyon. El kriyador ensanyandose sovre eyos no tyene ke azer nada mas ke retirar su mamparo de sovre eyos. İ deşarlos kayer en mano de sus enimigos.
Moşe Rabenu promete ke a los kavos vyendosen los Cudyos en grande apreto, entyenderan ke eyos mismos fueron los kavzantes de sus angustyas i tornaran de sus negras kominos, el kriyador se apiadara otra vez de eyos, se vengara de sus enimigos. İ les dara ropozo i un buen avenir a los Cudyos. Syendo todo es su poder. El es el ke melizina a todos.
Esta Şira (poesiya) Şirat Aazinu tyene la enportansa por el sostenimyento de la relijyon.