Av. Nusret Kadri SOYCANBu haftaki sayımızda okurumuz Avukat Nusret Kadri Soycan`ın derlediği araştırmaları, anıları ve düşüncelerini içeren metnini yayınlıyoruz. Soycan, anılarından yola çıkarak, bir dönem Edirne Yahudileri`nin tarihini, 1934 Trakya olayları ile II. Dünya Savaşı ve gölgesindeki gelişmeleri değerlendiriyor
Selihot en la Sinagoga Neve Şalom despues de una interrupsyon de 20 anyos
Alhad primer dia del mez de oktobre, desde la oras 4.30 de la manyana, antes ke el sol espunte, la grande sinagoga Neve Şalom estava yena de yahidim prezentes para resitar todos endjuntos, kon fervor i feuzya, las orasyones de Selihot. Entre eyos byen entendido el Gran Rabino Isak Haleva , el Prezidente de muestra Komunidad Silvyo Ovadya, Rav Izak Alaluf i munchos otros grande relijyozos i notavles de la kolektividad Judia de Estambol.
En su diskorso Rav Haleva ekspreso su grande kontentes de selebrar el ritual de Selihot kon una asistansya tan nombroza i ekspliko la sinyifikasyon de esta ermoza fyesta ansi kel senso profundo de Kipur.
A su torno, Rav İzak Alaluf ekspliko el senso de las orasyones de Selihot; i la atmosfera ayego a un punto muy alto de emosyon kuando mansevos de muestra kolektividad sonaron el Shofar.
A la salida un ermozo pranso de Seuda aparejado por el komite de la Matan Baseter asperava los yahidim.
Para kada anyo mijorado en la paz i la serenidad.
La famiya İşman en dolyo
La semana pasada, dos dias despues de Rosh Ashana, Moise İşman serro los ojos por syempre, entornado del amor i del respekto de sus ijos, ermueras i inyetos.
Ombre de byen, ansyano prezidente del komite egzekutivo de la Kolonia de Vakansas de Burgas, Moise İşman i su mujer Süzan <z.l.>, todo komo lo avia echo Esther Tani de bendicha memorya, izyeron enfloreser esta institusyon, la kuala da kada enverano la posibilidad a trenta a kuarenta ninyos de pasar dos mezes en un klima salubre i una atmosfera sosyal edukativa ,imprenyada de kerensya i profundo kudyo
Buen marido, buen padre,buen kolavorador , Moise İşman personifikava antes de todo “el amor inkondisyonal por la vida”... Aunke muy realisto, el era pozitivo i optimisto i bivyo kada momento de su larga egzistensya kon ardor.
Ke su alma repoze en paz.
Muestros sentimyentos de profunda amistad a sus dos ijos Selim i Seyfi Işman, sus ermueras Verjel i Suzeta ansi ke a sus inyetos.y
