Dora NİYEGO
Orhan Pamuk, el selebre ekridor Turko gano el Premio Nobel de Literatura en el diziocho de este mez.
Orhan Pamuk es nasido en Estanbol en el anyo 1952. El es de una famiya rika i enstruida ke bivyeron en Nishantash (un foburgo riko) de EstamboL. Duspues ke eskapo sus estudios de lise en Robert College, Pamuk estudio arkitektura en la Universita Teknika de Estambol ma el abandono este departamento de la universita porke no le entereso muncho i empeso a estudiar jurnalismo en la Universita de Estambol. Entre los anyos 1985 i 1988, Pamuk estuvo en la Universita de Colombia en New York.
Orhan Pamuk empeso a eskrivir sus ovras en el anyo 1974. Sinko de sus livros fueron publikados en Ingles: The White Caste 1991 (El Kastilyo Blanko),The Black Book 1995 (El Livro Preto), New Life 1997 (La vida Mueva), My Name Is Red 2001 (Mi nombre Es Kolorado) i Snow 2004 (Inyeve). Sus ovras fueron traduısada en mas de vente linguas.
Orhan Pamuk tiene un talante ralo en siendo un ekridor ke kombina el Oriente i el Oksidente en mezmo tiempo. Sus ovras son sovre la interaksiyon del Oriente i el Oksidente i entre la parte Muslumana de la Turkiya i su proksimidad politika i jeografika kon el Oksidente. Puede ser ke es por esta razon ke sus livros estan enteresando los lektores Turkos i los lektores Evropeenos.
En sus ovras Pamuk empleyo munchos teknikos derivados del Oksidente para eksplikar las temas i los medios del İmperio Ottomano i de la Turkiya moderna. Su estilo i sus deskripsiones son komparadas kon los selebros ekridores Borges i Garcia Marquez.
Las ovras de Pamuk ganaron munchos premios ma su fama enternasyonal empeso a ekspandirse kon su livro Adım Kırmızı (Mi Nombre Es Kolorado). La historia de este livro esta pasando en el diisejen siglo en Estambol, en el tiempo del Rey Murat el Treser (Sultan Murat) del Imperio Ottomano. En meldando esta historia, el lektor esta sintiendo la tansion entre el Oriente i el Oksidente.
Pamuk tiene un respekto grande por el ekridor William Faulkner ke reusho a kombinar la historia komplikada kon la literatura moderna, kon un arto siendo en mezmo tiempo muevo, arkaik i korajozo. 'I yo kije azer lo mezmo' esta dizyendo Pamuk.
Duspues ke gano el Premio Nobel, kuando le demandaron sus sentimentos, Orhan Pamuk disho ke esta onor no es para el ma es una onor a la literatura i la kultura ke el esta reprezantando.
