Klara PERAHYAA la sigida de largas deliberasyones, los premyos Nobel del anyo 2006 fueron atribuidos de la manera sigyente: Ekonomia: a “Edmund Phelps” (Amerikano) por su lavoro kontra el dogma Neo liberal. Medikeria i Fizyolojia: a “Andew Fire i Graig Mello” (Amerikanos) Kimika: a “Roger Komberg” (Amerikano). Fizika: a “George Fitzgerald i John C Mather” (Amerikanos). Literatura: a “Orhan Pamuk” (Turko). Paz: “Muhammad Yunus i su
Şeli GAON
Keridos Lektores,
Antes dos tres semanas meldi en una revista una historya muy enteresante i kije partajarla kon vozotros.
En la historya ay un rey, ke desido de azer un kamino muy anço para su puevlo.İ kijo organizar una kompetisyon, emportante ke todos se van a akodrar kon tyempo,antes de avrir este kamino al puevlo. Anonsyo ke todos los ke keren pueden partisipar a esta kompetisyon, i a la fin el rey dicho ke va determinar el ke va pasar el mijor de este kamino, i lo va rekompansar.
El dia de la kompetisyon, todas las personas arrivaron de todo modo de sivdades a la kapital.
Unos de eyos trucheron sus arabas las mas ermozas, las mujeres sus vistimyentas frapantes. Los mansevos vistidos se aparejaron a koryer en el kamino muevo. Enfin, munchas personas pasaron de este kamino en el enterval d’el dia entero i kuando terminaron i vinyeron al lado d’el rey; todos se kecharon de la mizma koza.
“Aviya en medyo d’el kamino un monton (yığın) de piedras i de penyas (kaya) ke estavan detenyendo las personas a avansar en el kamino. Aviya mizmo cente ke se estavan tornando a no pueder kontinuar .
A la fin d’el dia; solo un viajador termino el kamino bolado de la kanserya. El entero sudado aryento del polvo i la tyerra vino delantre el rey, i s’ enkorvo,kon muy grande respekto i le dyo una bolsa yena de oro i le dicho:
“Vide un monton de piedras i de penyas ke estavan detenyendo las personas a avansar en el kamino ke viaji. İze un grande eforso para alevantar estas piedras d’el medyo d’el kamino para ke la gente puedan avansar i en alimpyando vide debacho las piedras esta bolsa yena de oros.
Pensando ke dingunos d’el puevlo no pueden tener este karar de oros, pensi ke esta bolsa vos apartyene, i la remetyo al rey”.
El rey le respondyo en sonriendo “Estos oros te apartyenen”. “No dicho el ombre. Yo en mi vida entera nu tuve este karar de moneda”.
Si dicho el rey.”Tu ganates estos oros, porke tu sos el vensedor (galip) de esta kompetisyon.
“TU FUİTES EL SOLO KE PENSATES AL PUEVLO PARA KE PUEDAN AVANSAR EN EL KAMİNO, NO FUİTES EGOİSTO İ FASİLİTATES A LOS OTROS KE VAN A VİNİR DE DETRAS DE Tİ”.
Esto es el dover de un dirijente verdadero. Los dirijentes deven de avrir los kaminos de la ekipa ke estan lavorando en cuntos; deven de alumbrar el kamino, i deven de motivarlos.
Los grandes ke estan en la kavesera; dechan ovras a la cenerasyon vinidera, i toman bendisyones.
Las personas son pasajeras, ma los establesimyentos son permanantes.
Por esta razon, los ke vyenen muevos kale ke profiten de las eksperyensas de los vyejos para pueder avansar.
Al nombre de la umanidad, kale syempre avrir estos kaminos ke azen parvenir las personas a sus butos.
Los membros de este grupo se adjuntaron a la immortalitad kon las ovras ke izyeron; lo ke desharon no se puede efasarse de los meyoyos...
