Novelas... Novelas...

Tanto ke sus aktos politikos, la alta kualidad de su  individualidad va kedar eskrita en la historya de muestro payis.
Mas ke un politisyano Ecevit era un Simbolo; kon su probita inatakavle, su simplisidad, su pasyon por la poezia i el arte, su amor konjugal, su nasyonalizmo i su kudyo de ayudar absolutamente el desdechado i todos sus kompatriotos en apreto, el fue la Konsensya de una epoka.
Ke su alma repoze en paz.

LIMMUD
“Limmud” briyante fyesta intelektual, maraviyoza tradisyon ke se instalo en muestra komunidad grasyas a los esforsos i a las inisyativas  de un chiko grupo de intelektuales, tradisyon ke avre para los partisipantes, muevos orizentos literaryos i artistikos i desperta munchas vezes vyejas aspirasyones de manseves o byen reminisensyas de lekturas, enaltesyendo de esta manera el nivel sosyo-kultural de muestra kolektividad.
Ansi, Alhad el 12 del mez  koryente,  fueron nombrozos los ke  asistyeron a este ermozo akontesimyento intelektual.  Oradores briyantes tomaron la palavra sovre varyos sujetos, enkontros fruktuozos fueron realizados en una atmosfera de konvivyalidad ansi ke de profonda amistad i todos pudyeron gostar el inkontestavle plazer  de toparsen en una ambiansa rika de verdaderas valores.