Grandiozo Funeral Nasyonal para Bülent EcevitShabat el 11 Novembre, miles i miles de sitizanos kaminaron detras el kortejyo mortuaryo de Bülent Ecevit, personalidades ofisyales i governomentales komo djente del puevlo, kada uno a su nivel kijo ekspresar su amargura i onorar su memorya.
Klara PERAHYA
Muestros amigos Denise i Michel Benrey mos mandaron refleksyones de eskritores byen konosidos, enkavesadas por una pensada de Albert Einstein:
"Le monde ne sera pas detruit par ceux qui font le mal, mais par ceux qui les regardent agir et qui refusent d’intervenir" (el mundo no sera destruido por estos ke azen el mal, ma por estos ke los miran azer i refuzan de intervenir.
Es un kavzo ke no se puede nyegar “el mundo se esta azyendo kada dia mas kruel, sin ke ninguno parvenga a arrestar estas olas de violensa”. La semana de Bayram, ande mozotros, dos mansevos (debasho el efekto de la droga) mataron syete personas… En otros payizes, adolesentes atakaron otobuses yenos de pasajeros, otros metyeron huego a sharas… En varios lugares,en un momento de terrivle lokura, madres pusharon la inkonsensya asta meter fin a la vida de sus propyos ninyos etc..etc… Syempre en diferentes partes de la planeta, aunke manko monstruozo ma igualmente trajiko, soldados undidos en una terrivle atmosfera de peligro i de konstante insekuridad, travaron sovre prezumidos enemigos sin tomar en konsiderasyon ke se tratava de vidas umanas...
Por seguro las Autoridades de los diversos payizes izyeron o azeran sus dever, la Justisya tambyen: “enkuestas”, “arrestasyones”, “duzgamyentos”. Ma es ke se bushka a un nivel mas profondo, kualas son las razones primeras ke kavzaron estos aktos?
Lasitud de una egzistensya dominada por un estado interminavle de gerra o de prekaridad? Marazmo de una vida sin reel futuro, dedikada prioritaryamente a la ardor imperyoza de dominar? İnkapasidad de adaptasyon a una sistema de egzistensya de mas a mas difisil i insyerto? Liberalizmo ekonomiko salvaje, sin freno ni piadad, ke kavaka kada dia mas el abizmo entre la klasa prospera i la ke bive en la mizerya? İnvertimyento inevitavle de la “eskala de valores”, ke aktualmente mete al primer plano “la reushita materyal” al detrimento de los imperativos sosyo-etikos? Erozyon kontinual de syertos preseptos de baza ke se uzava transmeter de jenerasyon a jenerasyon?
No se trata de retornar al orden ansyano ni a la manera de pensar de muestros avuelos, el progreso es una realizasyon irreversivle i ninguno puede, sin eskalavrarse si mizmo, kaminar a kontra senso. Ma ay komo una devosyon munchas vezes syega, enverso todo lo ke es muevo… Ay el fanatizmo relijyozo ma tambyen el fanatizmo ateisto… El uno kere todo konservar el otro todo derrokar, portanto munchos savyos mos ambezaron ke se puede fraguar sin destruir i sovre todo ke mizmo si ninguno puede arrestar el enkaminamyento del tyempo, se puede luchar para la mentenensya de syertas valores ke son permanentes porke tyenen un kontenido umano i egzistensyal.
En mizmo tyempo ke la matematika, la fizika i la kimika, eske no kale sovre todo ensenyar a los ninyos a ser reelmente kriansas pensantes, responsavles de sus aktos?
