Veremos un poko... Supozando ke es el ombre solo ke esta lavorando, en prensipyo, puede el, okuparse, si no ay un arranjamyento diferente. Aktualmente, estamos vyendo de mas, en mas, ke los dos konjuntos estan lavorando. Par konsekuensa, kada uno de eyos, tyene su boz sovre la direksyon del budjeto familyal. Es lojiko, ke el mas organizado, mas kompetente en ekonomiya, se okupe de la “finansa!”...
Kuando es solo el ombre ke lavora, deve la mujer, o no, konoser lo ke el gana? Munchos diran ke depende...Ma, de kualo egzaktamente? Asigun mi, si en verdad, el ombre gana bastante, no aze eskasura, no desha a su mujer afrita de nada, no ay menester ke eya sepa grosh por grosh!!!...En el kavzo kontraryo, penso ke la mujer deve konoser el revenido, i esto es importante. Ansi se puede impedir de azer gastes lokos, depasando las posivilidades del ombre. Espesyalmente, kuando se esta pagando kon karta de kredito... Malorozamente, munchos (ombres i mujeres) no estan savyendo ande arretarsen.
Si en una unyon se esta aparejando el budjeto mensual, es razonavle de apartar una suma de “harchlik” para los gastes personal de la mujer. Siguro, en desparte de los gastes standardos, komo mantenimyento, i otros. Aki, esto pensando: i kualo, si es la mujer ke tyene la kasha?...Seriya un poko komik ke el marido le demande “argent de poche!”!!!..
Si se trata de un revenido fikso o limitado, es provechozo i prudente de azer kada mez, un budjeto. Ay gastes klasikos (fiksos), ke son mas o menos los mizmos, i kreo no ay menester de enumerarlos aki. Ya los konosemos todos. Ay i otros, komo distraksyon, vakansas, i mizmo en vezes vestimyenta ets... ke trokan i, al menester, se pueden remeter. Los gastes importantes son el mantenimyeto, la edukasyon de los ijos, menesteres sanitaryos ets...
Es razonavle de ser prontos a syertas sorprezas, i apartar un montante de rezerva. Aki, kero de muevo mensyonar la karta de kredito, ke asigun algunos, fasilita la vida..(acaba?!) Devo admeter ke este chiko rektanglo de karton, esta djugando un rolo imprtante en la finansa de una kaza... Ma a kondisyon de emplearlo kon prekosyon i no abuzar...
Keridos amigos, estas fueron mis ideas, i no las konsideresh komo konsejos. (aun ke penso ke son konsejos provechozos!) Ya esto sigura ke kada uno ya es bastante sezudo, para pueder rijir la ekonomiya de su nido...
