Şeli GAONAntes sej mezes en la transmisyon del pueder prezidensyal en Barınyurt empesi mi diskorso kon esta fraza:
La esperansa es la vida, la vida es la kerensya, i la kerensya es la solidaridad.
Vos kero avlar oy de la emportansa de la kerensya i la solidaridad.
Kero demandar vos: Kualo es el dover, la misyon de las dammas volontaryas ke se okupan de los mansevos, de los aedados i de los hazinos ?
Para kualo lavoran de alma i de korason, kualo es sus butos? Para eksplikar esto; vos kero kontar un diya de martes ke es el dia de aparejo de la kermes; ande munchas dammas se arekojen i lavoran. Kada martes a las onze de la demanyana, kada una viene al edifisyo ke se topa en la Kula.
En primero se suve una eskalerika, i se entra a la kamareta de las kapaches. Buenos dias ermanas; oooo vinido bueno i klaro, todas muy okupadas a kuzir savanas, tovajas, manteles , taponikos de mupak, i otras kozas.
Te responden de una fason ke no keren pedrer tyempo de sus kusturas, i la ke no save kuzir ke salga de la kamareta para ke no las embrolyen i para kontinuar sus lavoros kon kayades. De toda manera kada una i una en su makina appropriada, aturvada para eskapar lo ke tyene en la mano, i mirando delantre de si kon muncha atansyon.
Eyas veramente kreyen un montante de maraviyas kon sus manos bendichas. Salyendo de esta kamareta la mas emportante, puedemos ver; unas ke estan dando uti, otras asentadas kitando fofiles kon las manos de pitagra, i avlando, burlando kitan al rey meten al vezir. En una meza las volontaryas azyendo paketos la vidreria i metyendo presyoz para vender. İ otras ke estan penando i lazdrando a apartar las kozas vistidas; lo ke vale para vender, metyendolos a un koli, i echando lo ke no vale.
Los kostumes i los fostanes lavorados, las samarras, los kueros, se apartan para vender kon presyo alto.
Este lavoro es un lavoro muy kanseryozo i suzyo.Porke todos embian lo ke no les syerve, i para aranjar esto todo se kere muncho tyempo i pasensya.
Todo se aze kon una regula ekselante, i a midi las oras del komer todas estan en dieta. Se apareja; almodrote, armi, koftikas de prasa, salatas, albondigas i nada de engodrar. Fruta i kafe, tanto no se kome ke todo se eskapa kon muncha savor.
Se avla, se aze diskusyones de los evenementos de la semana; por egzempyo; la ija de la fulanika se kito d’el marido, el ijo de la vizina se fue a estudyar a la Amerika, la ija de la amiga movyo, la otra paryo, el inyeto tuvo Bar-Mitsva i otras kozas asemejantes. Se konta anekdotas para riyir, i veramente la persona se syente oroza de estar entre todos. Despues de komer se kontinua a lavorar fina una syerta ora i todos apoko apoko empesan a eskolar.
A la fin d’el anyo se realiza una kermes, todo se vende i kon la moneda ke se gana; se ayuda a los mansevos i las mansevas menestorozos ke no tyenen pueder a adelantar en los estudyos, en el lavoro i en la vida. A parte se ayuda a los vyejos ke estan muy bien mirados en los aziles, i a los hazinos ke estan en el ospital. El buto de las volontaryas es; de amijorear sus situasyones i ke esten orozos. Esto mos amostra ke el rezultado de la solidaridad de la s mujeres kon la kerensya para azer esto todo; avre kamino a las ovras sakras.
Yo penso ke; la fuersa de la kerensya, i la veluntad son los elementos los mas emportantes para una mujer por pueder ser kapachi i reushir en todo modo de espasyo en la vida. Las mujeres tyenen kalitades espesyales. Eyas koryen a todo modo de kozas i abastesen a los gastes de las asosyasyones. De otra parte; las volontaryas estan realizando sus fonksyones, en ayudando a las famiyas menesterozas para amijorear sus estados. Para azer esto todo se kere una fuersa ke vyene de aryento del korason, i sin neglijar sus kazas i sus responsabilitas siguramente.
Eyas tyenen el sentimyento de la byenfesensya en sus korasones. Kualo es el motivo ke unifika todas las volontaryas para azer estas byenfesensyas, estas piadades?, ke se esta realizando sin asperar nada; solamente la satisfaksyon umana.
La kesyon es bazada enriva de la kerensya, de la amor de la ermandad, de la solidaridad i del umanizmo.
Puedemos dizir ke estas mujeres son personas ke ven la verdad de la vida; ke no es en tomando ke una persona deviene oroza ma en dando. Ayudar al entorno es kreer al Dyo.
Vos auguro una invyernada oroza, en esperando de arrekojermos siempre kon pas i amor para lavorar mas muncho i ayudar kon veluntad.
La kayentor de muestra amistad i la amor de la ermandad para azer piadades son mas puederosos de todo modo de fuersas i detenimyentos ke rankontramos en muestra misyon sakra.
