Otrun poko de moabet...

Coya DELEVİ

Antes unas kuantas semanas, eskrivi sovre las mujeres i muchachas Djudias, sus saveduria...Me aviya bazado sovre los rekuerdos de Daisy Alalouf-Newell. Kero aki rengrasyar muestra amiga, Rachel Bortnick de Dallas. Eya, el diya mizmo ke aparesyo el “Şalom”, lo meldo en el Internet, i echo mesajes en el sitio Ladinokomunita. Ansi, rekomendo a sus miembros, (ke oy ya alkasaron al shifro 800), de vijitar el sitio del “Şalom”, i meldar mi eskrita...
Bueno... me akodro, en mi chikez, kuando se pruntava a una ninya kualo se va azer en engrandesyendo, eya respondiya:”Yo me vo azer novya!..” No esto muy sigura si estas chikas se ambezavan los konsejos, konsejas, kantikas ets... komo mensyono Daisy. Ma, gizar (un poko), rijir una kaza, kuzir a lo menos un boton kayido o un lugar deskuzido...Esto, naturalmente ya mo lo ambezaron muestras madres, aun ke estavamos estudyando.
En mi chikez, ya sintiya de mi Nona, o de mi madre romansas en J-Espanyol. No ize esforsos para ambezarmelas (ke manziya). Portanto, oy dayinda me akodro estos ritmos, i mizmo los byervos ke kedaron en un kantoniko de mi memorya... Djusto komo kedaron los rekuerdos. Al pareser, en muestra prima manseves, no mos enteresimos muncho a estas romansas Sefaradis... Deke?... Estavamos muy okupadas! Kon los filmos, kantikas Amerikanas o Fransezas de akeya epoka!...
Vinyendo a las muchachas de oy... Eyas no keren ser solo novyas, ma, mujeres ke tyenen kriaturas i karyera tambyen. En vezes, este dezeo se esta prezentando a eyas, komo un dilemno: “Karyera o kriatura?” El shifro de las mujeres ke lavoran por diversas razones, esta pujando de diya en diya. İ, los maridos se estan aserkando kon mas entendimyento a este dezeo.
No se puede komparar el estado jeneral aktual, kon el de antes 60ᇚ anyos. Oy, un grande shifro de ijas estan azyendo altos estudyos. Lojikamente, no se aspera de eyas, ke se asenten en kaza brodando! O mirando la T.V!, diya entero... Es muy normal ke van a kerer tomar el fruto de tantos anyos de meldar...Unas dezean lavorar, porke esto les asigura una independensya sosyal i ekonomik. Otras, son “ovligadas” de lavorar por menester materyal.
Kualas ke seyan las razones, el reel problema ampesa kon el bebe, espesyalmente en las unyones kon estrechos remedyos monetaryos. Pueden tener la shans de posedar sus madres ke les vyene en ayudo, para kudyar al bebe. En todo kavzo, la “parida” no tyene el lukso de deshar su lavoro, i tomar el riziko de no topar echo mas despues.
Las ke lavoran antas de kazar, i tyenen una buena pozisyon, ke pueden ser sus alternativas? Yo konosi en mi anturaje este djenero de kavzos. Unas, al koste de atrazar la felisidad de ser madre, dyeron la prioridad a sus karyera. Asigun eyas, las kriaturas tyenen menester de sus madres “Full Time” i no “Part Time”! Ma, siguro todas no pensan ansi. En la mizma pozisyon, ay las ke kontinuan a lavorar, tenyendo la posivilidad de pagarsen una profesyonal para el bebe (dada).
De ande, ande vine!... En rezume, yo digo ke no se puede jeneralizar. Lavorar es el dirito de la mujer. De otra parte, ser madre es una eksperyensa inkomparavle. Esto muy  sigura ke se arranja de una manera o otra, para gozar de la ermozura de ver engrandeser su kriatura...