El primero saludo yeno de amistad del grande Prelado i tambyen la Konvivyalidad i el Esprito de ospitalidad de los dirijentes de muestro Governo parvinyeron a disipar todo modo de malentendido i avyeron la puerta a relasyones amigavles entre dos maneras de pensar, las kualas (malgrado syertas chikas diferensyas de ekspresyon) son muy serkanas la una de la otra...
El eskopo es syempre el mizmo: la Paz i la Armonia Mundyal ansi ke la Viktorya kontra la prekaridad , la indjustisya i la violensa ...en un byervo la Vida en su ekspresyon la mas natural i la mas novle.
Este viaje fue antes de todo un djesto okumeniko en el senso el mas ancho , un djesto ke trespasa los limites del Kristyanizmo i engloba tambyen el Islamizmo i emplisitamente todo modo de relijyon monoteista “İr verso Dyo, kada uno por el kamino ke es el suyo, syempre en el respekto absoluto del ombre” .
Palavras de amistad fueron pronunsyadas, palombas (mensajeras de paz) fueron soltadas en el espasyo, el Papa i el Müftü meditaron endjuntos en la grande Meshkita Sultanahmet.
Syertas personas van a dezir ke es en un eskopo simplemente politiko ke esto fue echo... puede ser si, ma kale saver ke, en su signifikasyon primera, el vokable “politiko” tyene un senso istoriko muy pozitivo. El vyene del byervo “Polis” ke kere dizir Sivdad, i segun Platon i Aristoteles la verdadera Politika es djustamente akeya ke puede asegurar Armonia i buen Entendimyento al seno mizmo de la Sivdad, aktualmente el mundo.
No se puede nyegar el fakto ke los diskorsos del Papa ansi ke la maturidad ke manifestaron los Dirijentes Turkos aparejaron el terreno para un empesijo de verdadera avyertura entre las dos partes del mundo... no solo al nivel governomental o intelektual ma tambyen, lo ke es muy importante, al nivel popular ...
El Papa el mizmo disho a un syerto momento: Este ermozo enkontro va ayudar a topar los kaminos de la Paz, por el byen de la Umanidad.
En efekto, para pueder estableser un proyeto ke asegurara la armonia en el mundo , kale antes de todo aprontar las kondisyones ambiantes nesesaryas. I es djustamente esta atmosfera de voluntad de entendimyento le kreo la Vijita Papal ,despues el malorozo insidente de las palavras no muy klaras pronunsyadas en Almanya.
Un puerta se entorno... una mueva persepsyon de las kozas... una mueva manera de ir verso el otro... El espasyo entreavyerto es por seguro ainda muy estrecho, ma yeva en el la posivilidad de una mas grande avyertura verso la paz en el mundo.
